SHERIA ZA MAOMBI

 

UTANGULIZI

Si watu wengi wanafahamu kuwa maombi yana sheria zake yaani ukitaka maombi yako yajibiwe lazima ufuate sheria hizo za maombi, ikitokea umekosea au usipofuata sheria hizo hauwezi kupata majibu ya maombi yako hata kama utafunga na kuomba.

BAADHI YA SHERIA ZA MAOMBI

1.     Lazima uamini kwamba Mungu yupo na huwa anajibu maombi.

(Waebrania 12:6b)

“kwa maana mtu amwendeaye Mungu lazima aamini kwamba yeye yuko, na kwamba huwapa thawabu wale wamtafutao.”

 

Kuomba bila imani ni kupoteza muda wako kwa kuwa maombi ya bila imani hayawezi kusababisha matokeo.

 

2.     Tunatakiwa kuomba mambo yote kwa jina la Yesu.

 

(Yohana 15:16)

“Si ninyi mlionichagua mimi, bali ni mimi niliyewachagua ninyi; nami nikawaweka mwende mkazae matunda; na matunda yenu yapate kukaa; ili kwamba lo lote mmwombalo Baba kwa jina langu awapeni.”

 

(Yohana 16:24)

“Hata sasa hamkuomba neno kwa jina langu; ombeni, nanyi mtapata; furaha yenu iwe timilifu.”

 

Maombi yote tunayoyaomba lazima tuombe kwa jina la Yesu.

 

3.     Tunatakiwa kuomba sawasawa na mapenzi ya Mungu.

 

(Warumi 8:27)

 

“Kadhalika Roho naye hutusaidia udhaifu wetu, kwa maana hatujui kuomba jinsi itupasavyo, lakini Roho mwenyewe hutuombea kwa kuugua kusikoweza kutamkwa.”

 

Biblia imeweka wazi kuwa kuna kuomba sawasawa na mapenzi ya Mungu, tunaweza kuomba sawasawa na mapenzi ya Mungu endapo tutampa nafasi Roho Mtakatifu atuongoze katika kuomba kwa kuwa Biblia inasema “hatujui kuomba itupasavyo” yaani hatujui kuomba katika namna ambayo itamfanya Mungu atujibu ila Roho Mtakatifu ndiye awezaye kutuongoza kuomba sawasawa na mapenzi ya Mungu.

 

Ona kinachotokea endapo tutaomba sawasawa na mapenzi ya Mungu, soma (1 Yohana 5:15)

 

“Na huu ndio ujasiri tulio nao kwake, ya kuwa, tukiomba kitu sawasawa na mapenzi yake, atusikia.”

 

Nini maana kuomba sawasawa na mapenzi ya Mungu?

Ni kuomba kulingana na neno la Mungu au ni kuomba sawasawa na neno la Mungu linavyosema kwa kuwa Mungu huwa analiangalia neno lake ili alitimize.

 

(Yeremia 1:11-12)

“11. Tena neno la Bwana likanijia, kusema, Yeremia, waona nini? Nikasema, Naona ufito wa mlozi. 12. Ndipo Bwana akaniambia, Umeona vema, kwa maana ninaliangalia neno langu, ili nilitimize.”

 

Kwa hiyo ni muhimu sana kuweka kwa wingi neno la Mungu ndani yetu kwa kuwa neno la Mungu likikaa kwa wingi ndani yetu litaboresha mfumo au mifumo yetu ya maombi.

 

4.     Tunatakiwa kuomba bila kukata tamaa.

(Luka 18:1)

 

“Akawaambia mfano, ya kwamba imewapasa kumwomba Mungu sikuzote, wala wasikate tamaa.”

Kuomba bila kukata tamaa maana yake ni kuomba bila kuacha mpaka utapoona majibu yamepatikana ndio maana Yesu alitoa mfano wa mwanamke mjane aliyekuwa akidai haki yake mpaka akaipata ndipo akaacha kuidai.

 

5.     Mambo mengine hayawezekani ila kwa  kuomba na kufunga ndipo yatawezekana.

(Mathayo 17:21)

 

Yesu alipolitoa pepo ambalo wanafunzi wake walishindwa kulitoa aliwaambia hawakuweza kulitoa kwa sababu

a). Ya upungufu wa imani yao (Mathayo 17:19-20)

b). Mambo mengine ili kuyatatua yanahitaji kuomba na kufunga (Mathayo 17:21)

 

 

 

 

 

HITIMISHO

Nimekuonyesha baadhi ya sheria za maombi ili zikusaidie kukuwekea msingi mzuri ambao utakusaidia katika maombi yako, japo ziko sheria nyingi ila nimekuonyesha hizo chache ili kukuweka hamu ya kuzijua zingine, nakuhamasisha kulisoma neno la Mungu (Biblia) Roho Mtakatifu atakuwa anakuwezesha kuzifahamu sheria zingine za maombi.