FAIDA MBILI ZA KUMJUA MUNGU NA NAMNA UNAVYOWEZA KUMJUA MUNGU

Faraja Gasto

Utangulizi

(Ayubu 22:21)

“Mjue sana Mungu, ili uwe na amani; Ndivyo mema yatakavyokujia”

Kati ya vitu ambavyo kila mtu anatakiwa kuvipa kipaumbele, jambo mojawapo ni KUMJUA MUNGU, Kuna faida nyingi sana za kumjua Mungu wewe binafsi.

Unapomjua Mungu unapata AMANI, hiyo amani unayopata ina kazi kubwa sana kwenye maisha yako.

Zipo faida nyingi sana za kumjua Mungu, ila napenda kujikita kuzungumzia faida kuu mbili.

FAIDA ZA KUMJUA MUNGU

1.Itakusaidia kufanya maamuzi bila KUTAFUTA USHAURI KWA MTU AU WATU

Suala la kufanya maamuzi lipo katika maisha yetu ya kila siku, kila iitwapo leo kuna maamuzi unatakiwa uyafanye kwa mfano ule nini, umuoe nani, uolewe na nani, ushirikiane na nani, utoe au usitoe n.k kwa hiyo hayo ni baadhi ya mambo ambayo unatakiwa kuyafanyia maamuzi.

Katika kufanya maamuzi kuna wakati akili za mtu huwa zinafikia ukomo hapo ndipo huwa linakuja suala la kutafuta washuri wa nje (external advisor).

Biblia inasema “Mjue sana Mungu, ili uwe na amani; Ndivyo mema yatakavyokujia” kazi mojawapo ya hiyo amani ni kukusaidia kufanya maamuzi sahihi kuhusu mambo mbalimbali, hiyo amani ITAAMUA kwa niaba yako na inapoamua kwa niaba yako haina haja ya kutafuta washauri wa nje kwa kuwa ndani yako yako utakuwa unajisikia hiyo amani ikitawala unapofanya maamuzi, hautabiki njia panda katika kufanya maamuzi.

Haujawahi kusikia binti anamuomba ushauri binti mwenzake kuwa “Kuna vijana wameniambia wanataka kunioa sasa niko njia panda sijui nimkubalie nani” hali ya kubaki njia panda inatokana na KUTOMJUA MUNGU, ukimjua Mungu hautabaki njia panda, ukimjua Mungu unakuwa na amani katika maamuzi yako.

Angalizo: Kutafuta au kuomba ushauri kwa watu wengine sio vibaya ila lazima uwe na tahadhari unaomba ushauri kwa nani, kwa wakati gani, ushauri juu ya nini.

USISAHAU HILI: Ukiona inafika hatua UNABAKI NJIA PANDA HAUJUI UFANYE NINI, fahamu kuwa kuna ufahamu wa KiMUNGU umekosa katika fahamu zako, ndio maana nakuambia tafuta kumjua Mungu.

2.Itakutengenezea UJASIRI katika kuzungumza habari za Mungu na katika KUAMINI

(Danieli 3:1-25)

Kuna uhusiano kati ya UFAHAMU na UJASIRI, kama haufahamu kitu fulani unakosa ujasiri wa kuzungumza hicho kitu, kwa hiyo kama unakosa ujasiri wa kuzungumza habari za Mungu maana yake ni kwamba umekosa ufahamu kuhusu Mungu (haumjui Mungu sawasawa)

Kuna uhusiano kati ya UFAHAMU na IMANI, kama haufahamu jambo fulani unakosa imani juu ya jambo hilo, kwa mfano kama kama haufahamu habari za Yesu basi hauwezi kuamini habari za Yesu. Kwa hiyo kuna uhusiano kati ya UFAHAMU na IMANI.

Wapo watu wengi sana hawana ujasiri katika imani zao kwa sababu ya KUTOKUMJUA MUNGU, ujasiri upo wa aina nyingi, kuna ujasiri wa kuongea, kuna ujasiri wa kufanya jambo, ujasiri wa kuamini…………

Ukimjua Mungu unakuwa na ujasiri kwenye imani yako kwa hiyo huwezi kuwa na mashaka maana una ujasiri kuwa kile unachoamini ndicho kitatokea.

Ukisoma hilo andiko (Danieli 3:1-25) utaona hao vijana watatu walikuwa WANAMJUA MUNGU, kule kumjua MUNGU kuliwasaidia kuwa na UJASIRI katika kuzngumza kuhusu MUNGU wao na pia UJASIRI katika KUMUAMINI MUNGU WAO.

IKO HIVI: PALE UFAHAMU WAKO UNAPOISHIA NDIPO UJASIRI WAKO UNAPOISHIA NA NDIPO IMANI YAKO INAPOISHIA NA NDIPO UHURU WAKO UNAPOISHIA.

NINAWEZAJE KUMJUA MUNGU?

Hilo swali ni la msingi sana name nahitaji kulijibu kwa namna hii

1.    1.   Mpokee Yesu kuwa Bwana na Mwokozi wa maisha yako (Hii ni kwa ajili ya wale ambao hawajampokea Yesu).

Unaweza ukajiuliza kunauhusiano gani kati ya Yesu na Mungu

JIBU NI HILI: YESU NDIYE SURA YA MUNGU

Biblia inasema “ambao ndani yao mungu wa dunia hii amepofusha fikira zao wasioamini, isiwazukie nuru ya injili ya utukufu wake Kristo aliye sura yake Mungu”. (2 Wakorintho 4:4)

2.    2.   Soma habari zake kwenye kwenye Biblia na kwenye vitabu vya watumishi wa Mungu

(Wakolosai 3:16-17)

Kuna msemo unasema “Kusoma ni kusafiri” kwa hiyo unaposoma habari za Mungu unakwenda moja kwa moja kwa Mungu unaanza kumuona katika fahamu zako, unaanza kuhisi uwepo wake n.k

3.      3. Omba Mungu akupe “roho ya hekima” na “roho ya ufunuo” ili uweze kumjua kwa marefu, mapana  n.k na pia omba Mungu ayatie nuru macho yako

(Waefeso 1:17-18)