USIJITENGENEZEE MAADUI

Faraja Gasto

Kama hakuna maadui basi hakuna vita, kama kuna vita basi wapo maadui unatakiwa kukabiliana nao. Ukweli ni kwamba kuna vita ambazo watu wanazitengeneza wenyewe bila wao kufahamu, kuna watu wanajitengenezea maadui bila wao kufahamu. Kuna vita ambazo huwa zinatokea kwa sababu umejitengenezea maadui kwa hiyo unatakiwa kuwa makini sana ili usije ukajikuta unafanya kazi ya kuongeza maadui bila wewe kufahamu.

Mambo baadhi yanayowafanya watu kujitengenezea maadui bila wao kufahamu

1. Kukosa maarifa juu ya mambo mbalimbali (Hosea 4:6a)(Mithali 20:5)

Mungu anasema watu wake wanaangamizwa kwa kukosa maarifa, kwa hiyo mwanadamu ambaye hana maarifa anakuwa anaruhusu roho ya ujinga ambayo inatoka kwenye ufalme wa giza imkalie na kuharibu maisha yake na ya watu wanaomtegemea ndio maana utaona Mungu anasema “kwa kuwa umeyakataa maarifa, ATAWASAHAU WATOTO WAKO” kwa hiyo unapokataa maarifa unakuwa kwenye kazi ya kujitengenezea maadui bila wewe kufahamu.

2. Kutojua namna ya kulinda moyo (Mithali 4:23)

Biblia inasema “linda sana moyo wako KULIKO CHOCHOTE unacholinda kwa sababu kwenye moyo ndiko kunatoka chemichemi za uzima” kwa hiyo kama moyo unatakiwa kulindwa kuliko kitu chochote maana yake ni kwamba kila kitu kinautegemea huo moyo wako, maendeleo au mafanikio yako yanautegemea sana moyo wako, mahusiano yako na Mungu yanaweza kujengwa au kuvurugwa na moyo wako, moyo wako unaweza ukakufanya umsahau Mungu au umkumbuke Mungu, moyo wako unaweza kukudanganya maana moyo una tabia ya kumdanganya mtu ndio maana unaambiwa linda sana moyo wako kuliko yote uyalindayo kwa sababu moyo wako ukiwa sawa ni rahisi sana kufanikiwa, ni rahisi sana kwenda mbinguni, ni rahisi sana kumpendeza Mungu n.k.

Usipojua namna ya kuulinda moyo wako utajikuta umejitengenezea maadui bila wewe kufahamu. Nataka nikujulishe mambo machache kuhusu moyo wa mwanadamu.

· Moyo unaweza KUUMIA au KUVUNJIA (Isaya 61:1)

· Moyo unaweza kudanganya (Yeremia 17:9)

· Moyo ndio unamfanya mtu AAMINI au ASIAMINI (Warumi 10:10)

· Moyo unaweza kuwa MZITO (Mathayo 13:15)

· Moyo unaweza KULEMEWA NA MAMBO MBALIMBALI

· Moyo unaweza KUBEBA VITU MBALIMBALI kama vile siri, neno n.k (Zaburi 119:11)

· Moyo unaweza KUTEMBEA (Mathayo 6:21)

· Moyo una MACHO (Waefeso 1:18)

Biblia inapozungumza habari ya moyo haizungumzii moyo huo ambao uko ndani ya mwili wako upande wa mkono wa kushoto bali Biblia inazungumzia moyo wako wa mtu wa ndani (inner man) au UTU, kwa sababu mwanadamu ni roho, ana nafsi na ana mwili. Ukiona mtu ana tabia mbovu au tabia za kikatili shida iko kweny UTU, shida ni huo utu wa ndani (inner man) ndio maana Biblia inakuagiza kuulinda huo moyo wako wa mtu wa ndani – UTU.

Njia kadhaa za kuulinda moyo

(a). Weka neno la Mungu moyoni mwako kwa kulisoma na kulisikiliza (Zaburi 119:11) (Wakolosai 3:19)

(b). Usiwe mwepesi kumwambia au usipende kumwambia kila mtu mambo yako

Ninaposema usipende au usiwe mwepesi kumwambia kila mtu mambo yako namaanisha usiwe mwepesi kumwambia kila mtu mafanikio yako, mipango yako siri zako n.k kwa sababu kuna watu ukiwaambia mambo yako unakuwa umemwaga siri zako kwenye uwanja wa vita, wana mioyo ina matundu haina uwezo wa kutunza kwa hiyo ukiwaambia kitu lazima watakisema kwa watu wengine ambao wengine wanaweza wakawa si wema kwako. Ukweli ni kwamba wapo watu wana uwezo wa kutunza siri ila yapo mambo ambayo yanaweza yakawafanya wakavujisha siri zako kwa mfano ukifariki kuna uwezekano mtu mwenye siri zako akazivujisha, kuvurugika kwa mahusiano kati yako na mtu mwenye siri zako pia mtu mwenye siri zako anaweza kuzivujisha endapo kutatokea ushawishi uliojengwa juu ya ahadi ya fedha au nafasi n.k kwa hiyo kabla haujampa mtu siri zako jifunze kumsikiliza Mungu itakusaidia kujua nini cha kuongea, wapi uongee, uongee na nani n.k.

(Waamuzi 16:4-21)

Delila alihakikisha anampeleleza Samsoni ili apate kujua siri iliyoko moyoni mwake kuhusu asili ya nguvu zake, ilifika hatua Samsoni akaitoa ile siri ya moyoni akamwambia Delila pasipo kujua Delila yuko pale kwa kusudi maalumu (special mission), alipotoa siri ya moyo wake mwishowe alijikuta kwenye matatizo makubwa sana hatimaye alikufa.

Mara nyingi kutosamehe kunaua maisha ya kiroho ya watu wengi sana, pia kuosamehe kunaharibu hata maisha ya kimwili kama vile afya ya mtu n.k, kuna watu wana magonjwa kwa sababu ya kutosamehe wengine, Biblia inasema usiposamehe hata Mungu hawezi kukusamehe (Mathayo 6:15)

Unaposamehe unaufukuza uchungu uondoke moyoni mwako kwa sababu uchungu ulioko kwenye mioyo ya watu ndio unawafanya wafanye maamuzi mabaya sana ya kiroho na kimwili.

(d). Jifunze kuyazuia masikio yako kusikiliza mambo yaliyo tofauti na neno la Mungu

Biblia inasema “imani huja kwa kusikia” (Warumi 10:17), imani yoyote haijalishi ni imani sahihi au imani potofu chanzo chake ni kusikia sasa kumbuka Biblia inasema “kwa moyo mtu huamini” (Warumi 10:10) unaposikia jambo linakwenda moja kwa moja kwenye moyo wako likifika huko linaanza kutengeneza imani, mitazamo, fikira n.k itategemea umesikia nini, ukisikia vibaya utavuta roho kutoka kwenye ufalme wa giza zije zikuwezeshe kufanya mambo ambayo yako kinyume na mapenzi ya Mungu kwa hiyo unakuwa unajitengenezea maadui bila wewe kujua.

Wakati fulani nikasikia watu wanajadiliana “je ni halali mkristo kusikiliza nyimbo za kidunia” watu wengi hawafahamu kuwa silaha kubwa anayotumia shetani ni kutengeneza sauti za aina mbalimbali kwa njia ya mafundisho na muziki ili afanikiwe kuharibu miyo ya watu kwa hiyo ni vema uwe makini sana katika kusikia.

3. Kutumia vibaya ulimi (Mithali 18:20-21)(Mithali 15:4)

Ukisoma Biblia utaona kuna aina mbalimbali za ukorofi, aina mojawapo ya ukorofi unaotajwa na Biblia ni “ukorofi wa ulimi” (Mithali 15:4). Kutojua namna ya kutumia kinywa kumewafanya watu wengi kujitengenezea maadui badala ya marafiki, wapo wanawake ambao wamewafanya waume zao kuwa maadui zao bila wao kujua, Biblia inasema “mwanamkwe mwenye hekima hujenga nyumba yake bali mpumbavu huwa anabomoa kwa mikono yake mwenyewe” (Mithali 14:1) wanawake wengi wameharibu nyumba zao kwa sababu ya ukorofi wa ndimi zao mwishowe wanajikuta waume zao wamekuwa maadui zao.

Biblia inasema “uzima na mauti huwa katika uwezo wa ulimi” (Mithali 18:20-21) kwa hiyo ukiutumia vibaya ulimi wako utajikuta umejitengenezea mauti na matati mengine bila wewe kufahamu kwa sababu kuna nguvu katika kinywa cha mwanadamu.

4. Kutokuwa na amani na watu (Waebrania 12:14)

Biblia inaposema “tafuteni kwa bidii kuwa na amani na watu wote” maana yake ni kwamba suala la kuwa na amani na watu wote linahitaji BIDII au JITIHADA kila inapoitwa leo. Ukishindwa kuishi na amani na watu wote unakuwa unajitengenezea maadui bila wewe kujua, kwa sababu watu wanapokuchukia ni rahisi sana kukusingizia, ni rahisi sana kukushuhudia uongo, ni rahisi sana kukuangamiza hata kama wanaona kuna shimo mbele yako hawatakuambia kwa sababu hauna amani nao.

Biblia inaposema “tafuteni kwa bidii kuwa na amani na watu wote” maana yake ni kwamba unatakiwa kuwa na mahusiano mazuri na watu wote, anaposema watu wote hamaanishi walio wa imani moja na wewe, bali hata wale ambao wana imani tofauti nay a kwako ni muhimu uwe na amani nao ndio maana Biblia inataka ufahamu kuwa suala la kuwa na amani na watu wote linahitaji bidii au juhudi.

5. Kuchekea dhambi katika maisha ya mtu binafsi au kwenye familia

(Zaburi 101:7)

“ Hatakaa ndani ya nyumba yangu mtu atendaye hila. Asemaye uongo hatathibitika mbele ya macho yangu”.

Hayo ni maneno ya Mfalme Daudi alipogundua dhambi na kuchekea dhambi kunatengeneza maadui alijiwekea huo utaratibu kwamba hatakubaliana na dhambi ya aina yoyote katika malango yake.

Kuna familia ambazo utaona watoto wakifanya dhambi za hapa na pale halafu wazazi wanaona kukemea ni kutowapenda au kutowatendea haki watoto, sina uhakika kama wazazi walio wengi wanafahamu kama kuchekea dhambi ni kutengeneza maadui watakaowararua siku moja.