ROHO YA KUSAHAULIKA

 

Faraja Gasto

Hii ni roho chafu inayowafanya watu kusahaulika pia inayafanya maeneo kusahaulika.

Ndio maana unakuta watu wamechumbiana halafu mmoja akaenda kusoma lakini akamsahau mchumba wake akapata mchumba mpya.

Ndio maana unakuta mtu anamuaga mkewe kuwa anakwenda kutafuta pesa mahali fulani lakini akizipata anamsahau mkewe, anasahau kama ameacha familia kisha anaoa tena.

Ndio maana unakuta mtu anawatendea watu mema lakini wakifanikiwa wanamsahau.

Ndio maana unakuta mtu anajitoa kusomesha watoto wake lakini watoto wakifanikiwa wanamsahau.

Hii roho ikikaa juu ya eneo, eneo hilo halitapata maendeleo hata kwenye mipango ya maendeleo halitajadiliwa.

(Esta 2:21-23)

roho ya kusahaulika ilisababisha Mordekai hakukumbukwa, japo alitenda jambo jema lakini hakukumbukwa.

Maombi ya kufunga siku tatu yalishughulikia mambo mbalimbali katika ulimwengu wa roho, maombi yale yalishughulikia roho ya kusahaulika.

Ona kilichotokea baada ya yale maombi, MORDEKAI ALIKUMBUKWA na akatendewa mema, soma (Esta 6:1-11)

(Mwanzo 40:14-15)

Baada ya Yusufu kuwatafsiria watu wawili ndoto, Yusufu alimwambia mmoja kuwa "utakapopata mema UNIKUMBUKE"

Lakini pamoja na kumwambia amkumbuke, yule mtu hakumkumbuka Yusufu.

Roho ya kusahaulika ndio ilisababisha Yusufu asahaulike.

NB: Japo Yusufu alikuwa gerezani lakini ALIKUWA ANAMUOMBA MUNGU AMTOE HUMO, kama alimwambia mfungwa mwenzake akitoka amkumbuke (Mwanzo 40:14) basi uwe na uhakika alikuwa anamuomba Mungu amtoe gerezani.

Sasa ona kilichotokea baada ya miaka miwili, Mfalme Farao akaota ndoto halafu akakosekana mv wa kutafsiri ndoto (Mwanzo 41:1-8) 

Yule mtu ambaye alitafsiriwa ndoto na Yusufu ndipo alipomkumbuka Yusufu, ona alichosema "nayakumbuka makosa yangu leo (Mwanzo 41:9)

Baada ya hapo akamjulisha Mfalme Farao kuwa yupo mtu anayeweza kutafsiri ndoto yako (Mwanzo 41:9-13) 

Ndipo Farao akaagiza Yusufu atolewe gerezani (Mwanzo 41:14-45)

NB: roho ya kusahaulika inaweza kumfanya mtu asahaulike, shughulikia roho hii kwa njia ya maombi.