KUSUDI LA KUZALIWA KWA YESU

 

(Mathayo 1:18-21)

Mambo utakayojifunza

1.Kusudi la kuzaliwa kwa Yesu

2.Namna tunavyopswa kusherehekea sikukuu ya kuzaliwa kwa Yesu

UTANGULIZI

Watu wengi wakristo na wasio wakristo wamekuwa wakifanya sherehe katika sikukuu ya kuzaliwa kwa Yesu maarufu kama krismasi (Christmass).

Watu wengi wakristo na wasio wakristo wamekuwa wakisherehekea vibaya sikukuu hii kutokana na kutofahamu hasa lengo la kuzaliwa kwa Yesu au lengo la Yesu kuja hapa ulimwenguni.

Watu wengi wamekuwa wakiweka nguvu nyingi katika manunuzi ya vitu mbalimbali kama mavazi na chakula  pamoja na kwenda kutalii sehemu mbalimbali, sio vibaya kufanya hayo yote nyakati za sherehe ila kabla ya kuwekeza nguvu nyingi katika mambo hayo ni vema uwe na ufahamu kuhusu sherehe hii kiini chake ni nini, ukifahamu lengo la Yesu kuja hapa duniani naamini hautasherehekea kimakosa.

N.B Tunaposherehekea kuzaliwa kwa Yesu tarehe 25 mwezi wa 12 kila mwaka haimaanishi kuwa Yesu alizaliwa tarehe hiyo ila tunaitumia siku hiyo kukumbuka au kama kumbukumbu ya upendo wa Mungu kwa wanadamu kwa kumtoa mwanawe wa pekee kwa ajili ya ukombozi wa wanadamu.

KUSUDI LA KUZALIWA KWA YESU

(Mathayo 1:21)

“Naye atazaa mwana, nawe utamwita jina lake Yesu, maana, yeye ndiye atakayewaokoa watu wake na dhambi zao.”

Kutokana na andiko hilo tunapata kufahamu kuwa kusudi la Yesu kuja hapa ulimwenguni ni ili “AWAOKOE WATU WAKE NA DHAMBI ZAO”

 

(Luka 10:19)

“Kwa kuwa Mwana wa Adamu alikuja kutafuta na kuokoa kile kilichopotea.”

Kutokana na fungu hilo tunapata kufahamu kuwa Yesu “ALIKUJA KUTAFUTA NA KUOKOA KILE KILICHOPOTEA”

 

Kwa kuwa Yesu alikuja kutafuta na kuokoa kile kilichopotea ndio maana malaika wa Mungu wanasherehekea pale mwenye dhambi mmoja anapotubu au anapomwamini Yesu.

 

“Nawaambia, Vivyo hivyo kutakuwa na furaha mbinguni kwa ajili ya mwenye dhambi mmoja atubuye, kuliko kwa ajili ya wenye haki tisini na kenda ambao hawana haja ya kutubu.”

(Luka 15:7)

 

NAMNA TUNAVYPASWA KUSHEREHEKEA SIKUKUU YA KUZALIWA KWA YESU (CHRISTMASS)

1.     Tunapaswa kuwaambia wengine habari za Yesu ili waokoke (tunapaswa kuhubiri injili)

(Mathayo 28:19-20)

“19. Basi, enendeni, mkawafanye mataifa yote kuwa wanafunzi, mkiwabatiza kwa jina la Baba, na Mwana, na Roho Mtakatifu; 20. na kuwafundisha kuyashika yote niliyowaamuru ninyi; na tazama, mimi nipo pamoja nanyi siku zote, hata ukamilifu wa dahari.”

 

Kwa kuwa kusudi la kuzaliwa kwa Yesu ni kuwaokoa wanadamu, tunapaswa kusherehekea sikukuu hii kwa kuwashuhudia wengine au kuwaambia wengine habari za Yesu au kuhubiri injili.

 

2.     Tunapaswa kutoa fedha zetu au vifaa mbalimbali vitakavyosababisha injili iwafikie wale ambao hawajamwamini Yesu.

(Warumi 10:14-15)

“14. Basi wamwiteje yeye wasiyemwamini? Tena wamwaminije yeye wasiyemsikia? Tena wamsikieje pasipo mhubiri? 15. Tena wahubirije, wasipopelekwa? Kama ilivyoandikwa, Ni mizuri kama nini miguu yao wahubirio habari ya mema!”

 

Sisi ambao tayari tumemwamini Yesu tunapaswa kutoa fedha zetu ili injili ihubiriwe, tunapaswa kununua vifaa vya kuhubiria injili na kuwapa wahubiri au kuvitoa makanisani ili injili izidi kuhubiriwa pia tunapaswa kuwasafirisha wahubiri wa injili ili waende kwenye umisheni.

 

Biblia imeweka wazi kuwa hakuna askari aendaye vitani kwa gharama zake mwenyewe, askari anahitaji kupelekwa.

“Ni askari gani aendaye vitani wakati wo wote kwa gharama zake mwenyewe?” (1 Wakoritho 9:7a)

 

3.     Tunapaswa kumpa Mungu vilivyo bora .

(Mathayo 2:11)

Mamajusi walipokuja kumtazama Yesu walimtolea Yesu tunu, uvumba, dhahabu na manemane.

Tunaposherehekea kuzaliwa kwa Yesu tunapswa kukumbuka kuwa Yesu alitolewa na Mungu kama zawadi ya Mungu kwa ulimwengu ili wanadamu waokolewe, kama Mungu alitoa kilicho bora na cha thamani (mwanawe wa pekee) nasi tunapaswa kumpa Mungu ambavyo ni bora na vya thamani.