SOMO LA HAMASA NDANI YA BIBLIA

Mwl.Faraja Gasto

Hamasa ni nini?

Hamasa ni kitu kisichoonekana kwa macho kinachokusukuma ujitoe kufanya jambo fulani kwa moyo wako wote, kwa nguvu zako zote, kwa akili zako zote n.k. Hamasa hauwezi kuiona ila matokeo yake yanaweza kuonekana.

Hamasa ni kitu kikubwa sana ambacho kinaweza kusababisha matokeo chanya na pia kama ikikosekana kuna uwezekano wa kupata matokeo hasi katika jambo fulani.

Tabia tatu za hamasa

1.Huwa inaingia ndani ya mtu kwa njia mbalimbali.

2.Inaweza kuongezeka au kupungua.

3.Inaweza kutoweka kabisa kutegemeana na mazingira fulani kama vile kuvunjwa moyo, kutoheshimiwa n.k.

Hamasa ni suala la kiroho, maana yake hamasa huwa inavuta nguvu ya kiroho inayomfanya mtu ajitoe kuhakikisha amefanikisha jambo fulani. Hamasa imetajwa kwenye Biblia kama “kuamsha roho” unaposoma Biblia ukaona pameandikwa “Bwana akaamsha roho ya………………………” ufahamu kuwa Biblia inazungumzia suala la hamasa, kwamba Mungu aliachilia HAMASA/ HAMASIKO ndani ya huyo mtu ndio maana utaona kila mahali ambapo Mungu alipoziamsha roho utaona kuna kazi ilikuwa inakwenda kufanyika. (Ezra 1:1)(Hagai 2:14)

Hamasa inaongeza nguvu ndani ya mtu.

Kwa mfano, wachezaji wanapokuwa wanacheza huwa wanahitaji hamasa, pamoja na mazoezi wanayofanya wakikosa hamasa lazima watashindwa tu, washangiliaji ndio huwa wanawatengenezea wachezaji hamasa ya kujikaza ili washinde. Kwa hiyo wachezaji na washangiliaji wote wana nafasi katika ushindi wa timu.

NJIA BAADHI ZA KUTENGENEZA HAMASA/HAMASIKO

1.Kutoa ahadi fulani na kuitekeleza

(1 Samweli 17:25-32)

Tunaona Daudi aliposikia kuhusu zawadi atazopewa mtu atakayemuua mfilisti, hamasa iliingia ndani yake akaamua kujitoa kwa ajili ya kwenda kukabiliana na Goliathi.

Kwa mfano wanafunzi wengi wanaoshindwa (wanaofeli) mitihani mara kwa mara shida mojawapo inayowafanya washindwe ni kukosa hamasa. Ukitaka kuamini hili jaribu kulifanyia utafiti, kama una mtoto ambaye amekuwa anashindwa mitihani jaribu kumuahidi kumpa zawadi endapo atafanya vizuri kwenye mitihani ijayo, utakapomuahidi utashangaa ghafla ameanza kufanya jitihada za kujisomea ili aweze kufanya vizuri kwenye mitihani, ninakuhakikishia mitihani itakayofuata hatapata alama (marks) alizopata kwenye mitihani iliyopita.

2.Kutoa zawadi

Zawadi huwa inamtengenezea hamasa yule anayepewa zawadi, anapopewa zawadi kwa kile alichofanya huwa inamtia hamasa ya kufanya kwa ubora zaidi.

3.Kukubali uwezo wa mtu na kumpongeza au kumshukuru

Jaribu kufikiri mtu unamsaidia halafu hajawahi kukushukuru, utajikuta hamasa a kuendelea kumsaidia imepotea na hatimaye utaacha kabisa kumsaidia. Kilichosababisha usindelee kumsaidia ni kwa sababu hamasa imepotoweshwa na tabia yake ya kukosa shukrani.

Pia unapoukubali uwezo wa mtu ukampongeza kwa kiwango alichonacho huwa inamtia hamasa ya kuongeza bidii ili aweze kufika viwango vingine.

4.Kumtia mtu moyo kwa njia ya kumpa ushuhuda unaoingiza hamasa ndani yake ya kufanya jambo fulani.

(Mathayo 6:25-34)

Yesu aliwatia hamasa wanafunzi kwa habari ya kuutafuta ufalme wa Mungu na haki yake kwa kuwapa ushuhuda kuhusu ndege wa angani hawapandi wala hawavuni lakini WANAKULA CHAKULA, tena akazungumza kwa habari ya maua ya kondeni kwamba Mungu anayatunza. Yesu alichokuwa anakifanya ni KUWATIA HAMASA ili wautafute ufalme wa Mungu na haki yake.

5.Kumjali mtu kwa kumjulia hali, kumtembelea, kumuonyesha upendo n.k

(Matendo ya mitume 2:41-47)

Kanisa la kwanza watu walikuwa na hamasa kwa mambo ya ufalme wa Mungu kwa sababu ya upendo mkubwa sana waliokuwa nao, jaribu kufikiri mtu ameuza kiwanja chake akakupa wewe fedha ukafanyie mambo yako, unadhani utajitenga na huyo mtu? HAIWEZEKANI, kinachokufanya uendelee kuwa karibu naye ni HAMASA iliyoingia ndani yako kupitia upendo uliouona.

Mtu anapokata tamaa kwa ajili ya jambo fulani kwa mfano watoto hawana ada ya shule, huwa anajikuta hata hamu ya ibada huwa inapotea, ili apate moyo wa kuendelea kuja kusali lazima HAMASA iingie ndani yake. Kwa mfano ukimpa pesa akalipie ada ya shule, hilo jambo litampa hamasa ya kuendelea kusali maana ametiwa moyo.

Kanisa la sasa tumepoteza vitu vingi sana, ndio maana inafika hatua watu wanakuja kanisani kwa kusuasua, mara leo yupo, kesho hayupo, wengine inafika hatua wanaacha kabisa wokovu. Kitu kimojawapo kikubwa wanachokosa ni HAMASA (motivation).

Daudi anaposema alifurahi walipomwambia twende nyumbani mwa Bwana na akafurahia huo ujumbe ni HAMASA aliyokuwa nayo kutokana na kile anachopata nyumbani mwa Bwana.

6.Kwa kuonyesha matokeo ya hicho kilichopangwa au kilichokusudiwa kufanyika.

(Nehemi 2:17-18)

Biblia inasema kwamba Nehemia aliwaambai wayahudi wajenge kuta za Yerusalemu na kuyatengeneza malango yake ILI WASIWE SHUTUMU (ili wasiendelee kudhihakiwa au kudharauliwa). Kwa hiyo alimaanisha kwamba kujenga kuta na kutengeneza malango kutasababisha wao wasidharauliwe na mataifa (hayo ni matokeo ya kazi hiyo)

Kwa hiyo aliwaonyesha umuhimu wa kujenga kuta na kuyatengeneza malango ya Yerusalemu ghafla hamasa ikaingia ndani yao wakapata nguvu wakaanza kujenga.

7.Kiongozi kuwa mstari wa mbele katika mambo yote

(1 Timotheo 4:11-12)

Mtume Paulo alimkumbusha Timotheo kwamba mambo aliyomwambia ayaagize na kuyafundisha il awe kielelezo kwao waamini katika usemi na mwenendo, na katika upendo na imani na usafi.Kiongozi anapokuwa mstari wa mbele katika mambo yote huwa inawapa hamasa hata wale anaowaongoza, lakini kama kiongozi hayuko mstari wa mbele katika mambo yote hata anaowaongoza hawawezi wakahamasika kufanya chochote.

Kwa mfano kama kiongozi akiwa mstari wa mbele katika kutoa michango, katika maombi, katika kujifunza n.k huwa inawatia hamasa anaowaongoza ili wafanye kama anavyofanya kiongozi wao.

UHUSIANO ULIOPO KATI YA KUONA NA KUHAMASIKA

Hamasa pia inapatikana kwa kuona, mtu akiona jambo fulani limetendeka huwa anahamasika kufanya ili apate matokeo ambayo mwingine aliyapata.

Kwa mfano kama watu wanachanga pesa halafu hawaoni matokeo ya hiyo pesa iliyochangwa au kazi ya hiyo pesa iliyochangwa, watu huwa wanajikuta wamekosa hamasa ya kuchanga pesa zingine maana hawaoni kazi ya hiyo pesa lakini kama wanaona kilichofanyika huwa wanaendelea kujitoa maana wanaona kazi inafanyika.

Biblia inasema “tawi lizaalo husafishwa ili lizidi kuzaa”-(Yohana 15:1-2) maana yake ni sawa na kusema kwamba mkulima anapoona zao fulani linasitawi sana huwa haachi kupalilia na kuwekeza kwenye zao hilo maana linazaa na linamletea faida lakini kama haoni matunda yoyote basi hamasa ya kuendelea kulima zao hilo itatoweka.

Jaribu kufikiri mzazi ambaye ana watoto watatu wanaosoma, halafu mmoja akawa anafanya vizuri kuliko wengine lazima atajikuta anakuwa karibu na anamjali yule anayefanya vizuri kwa sababu anaona matokeo yake, kwa hiyo yale matokeo anayoyaona ndio yanampa hamasa zaidi ya kuwa karibu na huyo  mtoto na kuwekeza fedha za kutosha ili asome vizuri.

Mungu akubariki kwa kujifunza, japo nimekupa angalau kwa sehemu somo hili ili liweke kitu ndani yako.