ISHARA AU DALILI ZA KUTAFUTWA NA SHETANI

 

Faraja Gasto

(1 Petro 5:8)(Yohana 10:10)

Bwana Yesu asifiwe, napenda kukuletea somo hill ambalo halitakuacha kama ulivyo.

LENGO LA SOMO: Ili usimpe Ibilisi nafasi (Waefeso 4:27)

Ukisoma Biblia utagundua kuwa shetani huwa anatafuta watu (1 Petro 5:8)

“Mwe na kiasi na kukesha; kwa kuwa mshitaki wenu Ibilisi, kama simba angurumaye, huzungukazunguka, akitafuta mtu ammeze.”

 

DIRA YA SHETANI NA UFALME WAKE (VISION)

Kuiba, kuua na kuharibu (Yohana 10:10)

 

DHAMIRA YA SHETANI NA UFALME WAKE (MISSION)

Kutafuta NAFASI ya kuiba, kuua na kuharibu (Waefeso 4:27)

 

Kwa hiyo unatakiwa kufahamu kuwa kazi zote za shetani na ufalme wake zinaongozwa na dira ya ufalme wake ambayo ni kuiba, kuua na kuharibu.

 

Shetani anapomtafuta mtu huwa anakusudia kuiba, kuua na kuharibu, mapepo na wachawi wanapomshambulia mtu huwa wanakusudia kuiba, kuua na kuharibu ndio maana tunajifunza somo hili ili usije ukajikuta umempa shetani NAFASI (Waefeso 4:27)

 

(Ayubu 1:6-12)

Mungu alipomuuliza shetani "unatoka wapi" ona jibu shetani alilojibu "natoka KUZUNGUKAZUNGUKA na KUTEMBEA TEMBEA HUKU NA KULE" Shetani alipojibu hivyo haina maana kwamba yeye in mzururaji, yeye anazungukazunguka ili kutafuta NAFASI ya kuiba, kuua na kuharibu ndio maana Mungu alipompa kibali cha kumshughulikia Ayubu, shetani aliharibu Mali za Ayubu pia akaua watoto wa Ayubu. Hili ni somo muhimu sana la kukusaidia kushinda na zaidi ya kushinda.

 

FAHAMU MAMBO HAYA

1.      Shetani hamtafuti kila mtu Bali anawatafuta ambao hajawakamata, iko hivi hakuna mtu ambaye anaweza kutafuta alichokipata, Bali kila mtu anatafuta kile ambacho hajakipata hata shetani anawatafuta watu ambao hajawapata. Kwa hiyo kama umeokoka fahamu kuwa shetani anakutafuta usiku na mchana na kama haujaokoka fahamu kuwa shetani amekuweka kwenye himaya take sasa kumbuka ile dira ya shetani na ufalme wake niliyokuonyesha pale juu, fanya maamuzi ya kuokoka.

 

2. Shetani huwa anaanza kumtafuta mtu tangu akiwa tumboni, yaani vita ya shetani na mwanadamu inaanza toka mwanadamu akiwa tumboni ndio maana si ajabu kuona watoto wanafia tumboni au wengine wanazaliwa wamekufa na wengine wanazaliwa wakiwa mabubu au viziwi au viwete au vipofu, wengine wanazaliwa wakiwa wendawazimu, wengine wanazaliwa na vichwa vikubwa n.k hiyo ni vita ya shetani wala sio mapenzi ya Mungu iwe hivyo, usalama ni kuokoka na kukaa kwenye ufalme wa Yesu.

 

(Matendo ya mitume 3:1-2)

Ukisoma hilo andiko utaona kuwa huyo mtu alikuwa kiwete tangu tumboni hatimaye akazaliwa akiwa kiwete, ndugu usifanye mchezo na shetani hana huruma hata kidogo kama haujaokoka hebu okoka, zipo faida nyingi za kuokoka, ukisoma Biblia utagundua kuwa shetani alipofukuzwa mbinguni alikuja akiwa amejaa GHADHABU kwa hiyo anatamani kuiba, kuua na kufanya uharibifu kila kukicha.

 

3. Shetani yuko tayari kulipa gharama yoyote ili ampate mtu mmoja anayemtaka

 

(Mathayo 4:8-9)

Shetani aliwahi kumwambia Yesu kuwa "ukinisujudia" nitakupa hizi milki unazoziona.

Fahamu kuwa shetani anaweza kumpa mtu Mali lakini lengo lake ni kumuua huyo mtu au kuharibu kabisa maisha take ndio maana wote waliopewa utajiri na shetani hawana amani kabisa hawawezi kusema lakini wanaumia, wengine hawalali vitandani wanalala chooni au makaburini, wengine hawavai Viatu bali wanavaa ndala yaani shetani ni msumbufu hujawahi kuona ndio maana kuna wengine wamepata ajira kwa kutoa rushwa ya ngono, wengine wamefaulu vyuoni au mashuleni kwa kuuza miili yao, wao wanaona kawaida lakini shetani anawatamani, Kama haujamwamini Yesu mwamini leo kwa kuwa kuna raha huku kwa Yesu.

Shetani anawatafuta watu kwa njia mbili tu.

1. Anatafuta mtu MOJA KWA MOJA (direct)

2. Anatafuta mtu kwa njia ambazo SIO ZA MOJA KWA MOJA (indirect)

NJIA YA MOJA KWA MOJA

Shetani anaweza kumtafuta mtu kwa kumfuata mtu moja kwa moja yaani shetani anaweza kuja yeye mwenyewe kwa mtu.

(Mathayo 4:1-11)

Shetani alimfuata Yesu moja kwa moja akaanza kumshawishi ili akubaliane nae.

 

 

KWA NJIA ZISIZO ZA MOJA KWA MOJA

Shetani anaweza kuwatumia watu kwa mfano mke wako, mume wako, mazingira, watoto wako, ndugu, jamaa na marafiki.

(Mwanzo 3:1-7)

Shetani alimtafuta Adamu ila hakwenda moja kwa moja kwa Adamu bali alimtumia mke wa Adamu, make wa Adamu alipoingilika akala tunda lakini hauoni akifumbuliwa macho lakini Adamu alipoingilika akala tunda ghafla wakafumbuliwa macho wote wawili anaweza ukajiuliza ni kwa mini iwe hivyo? ni kwa sababu Adamu ndiye alipewa maagizo (yeye ndiye mbeba maono) alipokula tu mambo yakaharibika.

 

(Mathayo 16:21-22)

Shetani alimtafuta Yesu kupitia Petro, akaweka mawazo hasi ndani ya Petro ili amshawishi Yesu lakini Yesu akajua ni shetani akamkemea.

 

Hizi ni baadhi ya dalili au ishara kuwa shetani anakutafuta

1. MAKWAZO

Shetani huinua watu wa kukukwaza.

2. KUKOSA NJAA YA NENO LA MUNGU

Ukiona unashindwa kusoma Biblia, au unaona wahubiri wanachelewa kumaliza mahubiri au haupendi mafundisho fahamu kuwa hizo ni dalili mbaya.

3. KUONGEZEKA KWA USHAWISHI WA KUTENDA DHAMBI

Kwa mfano kushawishiwa kuzini, kuiba, kuabudu miungu n.k

4. MAWAZO MABAYA

Kati ya mambo yanayowasumbua watu, kitu kimojawapo ni mawazo mabaya, mawazo mabaya yanaletwa na shetani ili kumfanya mtu afanye dhambi.

5. KUKATA TAMAA YA KUOMBA

Kukata tamaa ya kuomba ni kuacha kuomba, hiyo ni dalili ya kutafutwa na shetani.

6. KUTOKWENDA IBADANI

Ukiona unaanza kukwepa kwenda ibadani fahamu kuwa shetani anakusogelea.

Hizo ni baadhi ya ishara au dalili za kunyemelewa na shetani, Mungu akubariki na akupe nguvu ya kutendea kazi.