NJIA RAHISI ZA KUPATA MTAJI WA BIASHARA

Faraja Gasto

Utangulizi

Sula la kupata mtaji limekuwa kilio cha kila mwenye WAZO la ujasiriamali. Lakini ukweli ni kwamba shida sio mtaji shida ni MFUMO WA KUFIKIRI.

Watu wengi wanapokuwa na mawazo ya biashara huwa hawakai chini na kutafakari kuhusu mambo muhimu sana kabla ya kuanza biashara, kuna watu wanalia hawana mitaji lakini ukweli ni kwamba mitaji wanayo ila hawajui kama wanayo mitaji.

Njia rahisi za kupata mtaji wa biashara

1.Badili ulichonacho kuwa mtaji (Cash equivalent)

“Ulichonacho kinatosha endapo UTAFIKIRI vya kutosha”

--Ask. David Oyedepo—

Nina uhakika una simu, una mavazi mazuri, una vifaa vya ndani vizuri. Vibadili hivyo kuwa fedha ya mtaji, njia mojawapo ya kuvibadili kuwa fedha ni KUUZA.

Ni vema ufahamu kuwa kuna wakati unatakiwa kuchukua hatua za hatari (risk taking) kwa kuwa kuuza vitu vyako ni kufanya maamuzi magumu ili yana faida kwa baadaye maana fedha utakazotumia kuwekeza kwenye biashara zitazaa na hatimaye utavinunua tena ulivyouza.

2. Washirikishe WAZO LAKO watu wa karibu na wewe, wale unaowaamini.

“Ukitaka kwenda haraka nenda peke yako ila ukitaka kwenda mbali nenda na wenzako”

--Msemo wa wahenga—

Nakumbuka wakati fulani niliona katika mtaa Fulani kuna fursa ya kuweka duka la kuuza vifaa vya shule n.k (stationery) wakati huo nilikuwa bado niko masomoni, nilipomaliza nikaanza kutafuta pesa ya kununua vifaa, ikabidi nikope kwa ndugu yangu shilingi laki moja, kasha nikakopa kwa mjomba wangu laki moja na elfu thelathini, baada ya hapo nikatfauta tarakilishi ya kukodi(computer), nikatafuta chumba nikapata cha laki na nusu ikabidi nizungumze na mwenye chumba akakubali nikampa kwanza shilingi laki moja kisha ile pesa niliyokuwa nayo nikatafuta mahali pa kupata mashine ya kutolea vivuli (photocopy), na kuprinti (printer), nikatafuta mahali Fulani pesa nikanunua baadhi ya vifaa. Nilipomshirikisha mjomba wangu fulani hilo wazo akaniambia “dah mbona haukusema mapema kama unataka kufanya hiyo biashara, kama ungesema mapema ungeweza kupata vifaa maana kuna mtu fulani alikuwa na hivyo vifaa ameacha hiyo kazi amesafiri kwenda nje ya nchi angeweza kukuuzia kwa bei nafuu”

Nilijilaumu sana kwa nini sikumwambia hilo wazo, ninachokufundisha hapa ni kwamba unapokuwa na wazo la biashara na hauna pa kuanzia jifunze kuwashirikisha watu unaowaamini ambao wako karibu na wewe hata kama hawatakupa pesa, watakupanua ufahamu na kukupa mawazo ya ziada. Ilifika hatua biashara yangu ikayumba lakini kanisa nilipokuwa nasali likaniazima pesa ya kuendeleza biashara yangu.

3.Kopa fedha kwa watu walio karibu na wewe kabla ya kukopa kwenye taasisi (financial institutions)

-Ni heri kukopa kwa watu walio karibu na wewe

-Kukopa fedha kwenye taasisi linatakiwa kuwa suala la mwisho endapo unaona haina jinsi.

ANGALIZO: Unapokopa kwenye taasisi hakikisha hiyo fedha haifiki nyumbani, nenda moja kwa moja ukanunue bidhaa, ukalipie pango la biashara n.k. Nakuambia hivyo kwa sababu ya uzoefu nilionao, watu wengi wanapofika na pesa za mkopo nyumbani ghafla mahitaji huwa yanaanza kuinuka kwa hiyo mkopaji anajikuta pesa aliyonayo haitoshi kwa kuanzia biashara.

4.Jiwekee malengo ya kupata mtaji ndani ya muda fulani kisha anza kuweka akiba

àKama una malengo ya kupata mtaji wa sh milioni moja hakikisha unaweka MUDA wa kupata mtaji huo kisha anza kuweka akiba.

àHakikisha unakuwa na nidhamu ya fedha, epuka kuitumia hiyo akiba.

“Haba na haba hujaza kibaba”-Usidharau akiba ndogo unayoweka