UFANYE UWEPO WAKO UWE NA FAIDA

Faraja Gasto

Mambo ya kujifunza katika somo hili;-

1.Mbinu zitakazosababisha uwepo wako uwe na faida

2.Umuhimu wa kuwa na uwepo wenye faida.

Lengo la somo: Ni kukupa mbinu zitakazosababisha uwepo wako uwe na faida katika jamii, katika familia yako, kazini kwako, kanisa, taifa n.k

Utangulizi wa somo

Kila mwanadamu huwa anazalisha kitu Fulani haijalishi ni chema au kibaya, ninapozungumzia kuwa na uwepo wenye faida maana yake ni kwamba uwepo wako ulete mambo ambayo ni mazuri (yanayojenga na kubariki maisha ya watu).

Faida ya uwepo wako inaonekana kutokana na mchango wako kwa jamii yako, familia yako, kanisa na taifa, faida ya uwepo wako inatokana na kile kinachozaliwa au kile kinachotokea ukiwepo.

Katika kuishi kwetu duniani tuwapo kwenye kazi zetu, makanisani, familia zetu n.k kuna watu wawepo au wasiwepo kunakuwa hakuna faida yoyote kwa sababu uwepo wao hautengenezi kitu ambacho ni chema lakini kuna watu wasipokuwepo lazima mtajua tu fulani hayupo(yaani kunaonekana kuna pengo) na hata akifika tu lazima itajulikana fulani amefika(pengo litazibika), hiyo yote ni kwa sababu uwepo wake unasababisha kitu fulani kutokea

Japo kuna watu wakiwepo lazima ubaya utaonekana au lazima mambo yaharibike, kuna watu wakiwepo lazima mambo mazuri yataonekana, inategemea na kile ambacho huyo mtu anatoa/anazalisha.

Nimeona na kusikia familia mbalimbali wazazi wakilaani uzao wao kwa kuwa hawaoni faida ya kuzaa kwa kuwa watoto ni watukutu, hawashiki, hawakubali kuelekezwa, pia kuna familia ambazo watoto wanatamani baba yao afariki au mama yao afariki kwa sababu hana faida yoyote, yaani awepo au asiwepo hakuna jema linalotengenezwa na uwepo wake.

Nakumbuka wakati ilipotangazwa kwamba mtumishi wa Mungu FANUEL SEDEKIA ana hali ambayo sio nzuri, kuna watu walifunga na kuomba kwa ajili yake, kuna watu walimlilia Mungu amponye.

Ninachotaka uone hapo ni kwamba kama uwepo wako hauna faida yoyote hakuna mtu atakuwa na hamu ya kuwa karibu na wewe, hakuna mtu atajihangaisha kufunga kwa ajili yako, hakuna mtu ambaye atawaza kuhusu maisha yako, hakuna ambaye atahangaika kukuombea.

Tunapojifunza kuwa na uwepo wenye faida maana yake ni kwamba ifike hatua uwepo wako uwe baraka katika maisha ya watu, uwepo wako usiwe balaa au usiwe hauna faida yoyote kwenye maisha ya watu wengine haijalishi ni katika jamii unayoishi, katika kanisa, familia na taifa.

Jitafakari kwa kujiuliza yafuatayo;-

Uwepo wako una faida gani kwenye jamii unayoishi?

Uwepo wako una faida gani kwenye kanisa unapoabudu?

Uwepo wako una faida gani kwenye  familia yako?

Uwepo wako una faida gani kwenye taifa lako?

Ikitokea umekufa watu watalia kwa sababu gani?

Unapopatwa na shida Fulani ni watu wangapi wanapata mzigo wa kuona unatoka kwenye shida hiyo?

MAMBO MATATU (3)YA KUFANYA ILI UWEPO WAKO UWE NA FAIDA

1.Tekeleza wajibu wako (implement your responsibilities)

Mungu alipomuumba mtu alimpa wajibu wa kufanya katika bustani ya Edeni, tunachojifunza hapo ni kwamba kuwajibika ni suala ambalo haliepukiki maadamu uko hai lazima ujifunze kuwajibika. Mungu anataka uwajibike kwa ajili yako mwenyewe na kwa ajili ya wengine.

Kila mwanadamu ambaye amejitambua huwa ana aina sita za wajibu ambao anatakiwa kuutekeleza;-

a).Wajibu katika familia

Kama ni baba ana wajibu wa kuongoza na kutunza familia, kama ni mama ana wajibu wa kutii kwa mume wake na kuhakikisha anamsaidia mumewe ili atomize majukumu na mipango mbalimbali, kama ni mtoto anawajibika kutii wazazi wake na kufuata kile anachoelekezwa na wazazi wake.

 b).Wajibu unaotokana na masuala ya kiroho au miongozo ya kiroho

Huu wajibu unategemea na wito wa mtu au msukumo wa ndani ya mtu husika katika kufanya jambo fulani.

 c).Wajibu katika jamii inayomzunguka 

Kushiriki kwenye misiba, sherehe mbalimbali, kushiriki vikao vya mtaa au kijiji n.k

d).Wajibu unaotokana na kazi ambayo mtu anaifanya

Kama mtu ni mwalimu wa shule anawajibika kufundisha kile alichopangiwa kufundisha, kama mtu ni mfanyabiashara anawajibika kuuza na kununua bidhaa n.k

e).Wajibu unaotokana na taratibu za kisheria

Kutunza mazingira yanayomzunguka, kupeleka watoto shule, kuheshimu vitu vya watu wengine kama mipaka ya viwanja n.k

f).Wajibu unaotokana na taratibu za mtu binafsi (wajibu wa kujipa mwenyewe)

Kwa mfano kusoma vitabu, kuwatembelea marafiki, ndugu n.k

Kwa hiyo kama wewe ni baba timiza wajibu wako kama baba, kuna familia zingine yaani baba au mama akiwepo watoto hawaoni faida ya uwepo wao yaani watoto wanatamani baba afe au mama afe kwa sababu hawatimizi wajibu unaowahusu, kuna familia ambazo wazazi hawaoni faida ya kuzaa kwa sababu watoto ni watukutu, hawashikiki wala hawaambiliki.

Ukitekeleza wajibu wowote unaokuhusu, lazima uwepo wako utakuwa na faida sana.

Kama wewe ni mume au baba wa familia hakikisha unatimiza wajibu wako kwa mkeo na kwa watoto (Waefeso 5:25-29).

Kama wewe ni mama hakikisha unatimiza wajibu wako kwa mmeo na kwa watoto (Wefeso 5:22-23).

Kama wewe ni kiongozi hakikisha unatimiza wajibu wako kwa unaowaongoza (1 Timotheo 4:11-12, 2 Timotheo 4:5).

2.Ishi ndoto zako, tembea kwenye maono yako na pia tembea kwenye wito wako au kwenye kusudi la Mungu juu ya maisha yako (live your dream, walk on your vision, walk on your calling, fulfill God’s purpose on your life)

(Mwanzo 41:37-38)

Yusufu alitembea kwenye kusudi la Mungu kwenye maisha yake ndio maana ilifika hatua mpaka Mfalme Farao akasema “tupate wapi mtu kama huyu ambaye roho ya Mungu iko ndani yake” Ukitembea kwenye kusudi la Mungu juu ya maisha yako lazima Mungu awe pamoja na wewe, kukufundisha na kukuongoza, Yusufu aliweza kutafsiri ndoto mbalimbali kwa kuwa Mungu alikuwa pamoja naye. Uwepo wa Yusufu kwenye nchi ya Misri ulikuwa na faida sana kwa sababu alitembea na Mungu.

Nataka nikupe mifano ya watu wachache ambao uwepo wao umekuwa na faida kubwa sana pale walipoamua kuishi ndoto zao au kutembea kwenye ndoto zao.

Nikianza na mtu anaitwa Mark Zuckerberg mwanzilishi na mmiliki wa mtandao wa facebook, alivumbua mtandao huu akiwa na miaka 20 tu. Leo hii Facebook ni mtandao maarufu duniani unaokuwezesha kuwasiliana na mtu ambaye yupo katika nchi yoyote duniani maadamu awe na akaunti kwenye mtandao huu, kupitia mtandao huu kuna watu wamefikiwa na injili, kupitia mtandao huu kuna watu imani zao zimekua, kupitia mtandao huu kuna watu wamepata wake na waume n.k hayo ni baadhi ya mambo chanya yaliyotokana na mtandao huu.

Mfano wa pili nahitaji nimzungumzie mtu anaitwa Alexander Graham Bell huyu anatajwa kuwa ndiye mgunduzi wa simu mnamo mwaka 1876.

Nimekuonyesha hao watu wachache ili kukuonyesha namna uwepo wako utakuwa na faida endapo utaamua kutembea kwenye ndoto zako au maono yako.

(Kutoka 5:1)

Uwepo wa Musa katika nchi ya Misri ulikuwa na maana sana pale alipokubali kutembea kwenye kusudi la Mungu, kupitia Musa wana wa Israeli walifanikiwa kutoka Misri kwenye nchi ya utumwa na mateso.

Ninachotaka uone hapo ni kwamba ukitembea katika kusudi la Mungu utaufanya uwepo wako uwe na faida pale utakapotembea katika kusudi la Mungu, unapokubali kufanya kile ambacho Mungu anakuelekeza kufanya lazima uwepo wako uonekane una faida.

3.Fanyika Baraka kwenye maisha ya watu wengine au Sababisha mambo mema kutokea (become a source of good things)

Sababisha mambo mema kutokea kwenye maisha ya watu wengine

a).Fanyika sababu ya watu wengine kupata furaha

b).Fanyika sababu ya watu kutojutia kuzaliwa

c).Fanyika  sababu ya watu wengine kumuona Mungu

d).Fanyika furaha ya watu wengine

e).Kama umeajiriwa, sababisha kampuni ipate faida n.k

(Matendo ya mitume 9:36-41, ukisoma habari hiyo utaona kuna mwanamke mmoja aitwaye Dorcas, huyo mama alikuwa akiwashonea wajane nguo, alifanyika Baraka sana kwa hao wajane hata ilipofika hatua amefariki walipata huzuni kubwa sana kwa kuwa waliona hakuna mtu wa kuziba hilo pengo.

Mzalie Mungu matunda kwa kufanya kazi njema.

(Yohana 15:1-2)

Ili uwepo wako uwe na faida, jifunze kufanya kazi ambazo zinamzalia Mungu matunda, kazi ambazo zitawafanya watu wampe Mungu sifa kwa sababu ya uwepo wako.

Naamini umewahi kusikia watu wakimwambia mtu Fulani “ukiwepo wewe hakuna kinachoharibika” yaani kila kitu kinakwenda vizuri.

Hivyo ndivyo Mungu anavyotaka kutuona tukimzalia Matunda kwa kila kazi njema.

UMUHIMU WA KUWA NA UWEPO WENYE FAIDA

1.Utapata watu wa kukuombea hata kama wewe haujajiombea(you’ll get people who will pray for your sake)

Dorkasi alikuwa mwanamke aliyekuwa na uwepo wenye faida ndio maana alipokufa kuna watu hawakukubali ikabidi wamuite Petro aje aombe na alipoomba Mungu akamrudisha tena Dorkasi.

(Matendo ya mitume 9:36-41) Unadhani kama uwepo wake ungekuwa hauna faida wangehangaika namna hiyo? Ni wazi wangemzika kama walivyokuwa wanazika watu wengine.

(Matendo ya mitume 12:5-17)

Uwepo wa mtume Petro ulikuwa na faida kwa kanisa ndio maana alipopatwa na tatizo, watu walijitoa kumuombea mpaka akatolewa gerezani.

Unaweza ukajiuliza kwani kuna umuhimu gani wa kuwa na watu wa kukuombea?..............................Ni muhimu uwe na watu wa kukuombea kwa kuwa kuna wakati huwa inafika hatua muda wa kuomba unapungua, kiu ya kuomba inapungua, mazingira hayakuruhusu kuomba n.k kwa hiyo kuna umuhimu wa kupata watu wa kuomba kwa ajili yako, njia mojawapo ya kupata watu wa kukuombea ni kufanyika Baraka katika maisha ya watu wengine.

2.Utakuwa mtu wa kutamkiwa Baraka badala ya laana (you’ll be blessed instead of being cursed).

Huduma ambayo Yesu aliifanya wakati akiwa hapa duniani iligusa maisha ya watu wengi sana hata ilifika hatua mwanamke mmoja akamwambia Yesu “libarikiwe tumbo lililokuzaa na matiti uliyonyonya (Luka 11:27).

3.Utaheshimiwa (you’ll be hanoured)

Kuna watu wanadharauliwa kwa sababu uwepo wao hauna faida yoyote, jaribu kutazama familia zingine utakuta baba wa familia hana heshima kwa kuwa hawajibiki kama baba wa familia.

Ninachotaka uone hapo ni kwamba kitu mojawapo kinachotengeneza heshima ni faida wanayoipata watu ukiwepo, kama uwepo wako hauna faida yoyote basi kudharauliwa litakuwa ni fungu lako.

Unaweza ukawa na elimu kubwa kuliko watu wote katika jamii, kanisa na familia yako lakini kama uwepo wako hauna faida basi tarajia kudharauliwa.

Hivi umeshawahi kujiuliza kwa nini watu wenye fedha hususani wanaotoa fedha zao kwa ajili ya mambo fulani wanaheshimika hata kama wana umri mdogo, ni kwa sababu uwepo wao una faida katika maisha ya watu.

(Wafilipi 2:5-11)

Yesu alifanyika Baraka kwetu kwa kuwa alikubali kufa kwa ajili yetu, uwepo wake katika dunia ulikuwa wa baraka sana alipokamilisha kazi aliyokuja kuifanya alikirimiwa JINA lipitalo majina yote ni sawa na kusema alipewa heshima kubwa sana.

Ninachotaka uone hapo ni kwamba uwepo wako unapokuwa na faida heshima itakuwa fungu lako.

4.Thamani yako inaongezeka (your value will increase)

Mbinu mojawapo ya kuongeza thamani yako ni kuhakikisha uwepo wako unakuwa na faida, uwepo wako ukiwa na faida utajikuta thamani yako inaongezeka, watu watatamani usiondoke, watu watatamani wakusikie, watu hawapata amani pale itakapotokea umepatwa na shida Fulani n.k.

(Mwanzo 39:1-6)

Tunaona Yusufu alipoingia kwenye nyumba ya potifa, nyumba ya Potifa ilianza kubarikiwa hata shamba la Potifa likabarikiwa kwa sababu ya Yusufu.

Uwepo wa Yusufu katika nyumba ya Potifa ulikuwa wa Baraka sana kwenye nyumba ile, thamani ya Yusufu iliongezeka sana ikafika hatua Potifa akamkabidhi Yusufu kila kitu akisimamie isipokuwa mke wake (mke wa Potifa).

Hapa nataka nikuulize wewe ambaye umeajiriwa, je! Uwepo wako una faida gani kwenye hiyo ofisi, kampuni au taasisi?

Je! Toka umeajiriwa umeshafanya mambo gani mazuri kwenye hiyo ofisi?

Kama uwepo wako hauna faida uwe na uhakika siku ikitokea kampuni hiyo au taasisi hiyo ikataka kupunguza wafanyakazi na wewe unaweza kujikuta umeondolewa kazini kwa kuwa uwepo wako hauna faida yoyote yaani hata usipokuwepo kampuni au taasisi haiwezi kupata hasara au tatizo lolote. Kama uwepo wako una faida hata wakitaka kukuaachisha kazi lazima utapata watetezi watakaosababisha usiondolewe kazini.