KUWA MAHALI SAHIHI

-----Mwl.Faraja Gasto----

UTANGULIZI

Kila mwanadamu ameumbwa kwa kusudi Fulani la Mungu kwa hiyo Mungu humtaka kila mtu kuwa katika eneo sahihi. Kuwa katika eneo sahihi maana yake ni kwamba ni kuwa katika eneo ambalo Mungu anataka uwepo, kufanya kazi katika eneo ambalo Mungu anataka ufanye kazi, kusoma shule au chuo ambacho Mungu anataka usome.

Shida au changamoto zinazowapata watu wakati mwingine zinasababishwa na watu kutokuwa katika eneo sahihi.

Ni muhimu kila mtu afahamu kuwa kuwa kuna Baraka hautazipata kama hauko katika eneo ambalo Mungu anataka uwepo.

(Mwanzo 2:15)

Adamu alikuwa anaishi katika bustani ya Edeni kwa sababu Mungu alimuweka pale kwa kazi ya kulima na kuitunza Bustani, faida alizopata Adamu alipokuwa katika eneo sahihi;-

a).Mungu alimuumbia mtu wa kumsaidia majukumu yake.

b).Alipata kila alichotaka(full supply).

c).Alikuwa amefunikwa na utukufu wa Mungu.

d).Alikuwa na kazi ya kufanya.

Ni muhimu ufahamu kuwa kuna faida za kuwa katika eneo sahihi kwa kuwa unapokuwa kwenye eneo sahihi ni rahisi kupata msaada wa Mungu katika maeneo mbalimbali, ni rahisi kupata mahitaji yako, ni rahisi kumsikia Mungu.

Angalia kitu ambacho Mungu alimuuliza Eliya, Eliya alipokuwa ametishiwa na Malkia Yezebeli kwamba atamuua tunaona Elia alikimbilia mahali Fulani lakini alipokuwa katika lile eneo Mungu nalimuuliza “Unafanya nini hapo Eliya” (1 Wafalme 19:9) Swali hilo aliulizwa kwa kuwa hakuwa katika eneo sahihi ndio maana Mungu anamuuliza Eliya kwa nini yuko hapo.

Cha kujifunza ni kwamba unaweza ukawa katika eneo Fulani lakini Mungu akawa hajaridhia kukuona ukiwa hapo.

Unaweza ukajiuliza nitajuaje kama niko eneo sahihi?

ISHARA ZA KUKUJULISHA HAUKO  ENEO SAHIHI (UNAFANYA KAZI ISIYO SAHIHI, UNASOMA SHULE AU CHUO KISICHO SAHIHI KWAKO)

1.Kufanya kazi ambayo hauna amani nayo, kazi usiyoifurahia (unafanya kazi lakini moyoni hauipendi au unajisikia kuichoka).

Soma ushuhuda huu, Mchungaji mmoja alijikuta anafanya kazi ya Mungu lakini anaona ni mzigo mzito kwake ikabidi aende mbele za Mungu kumuuliza kwa nini anajisikia kuchoka na hiyo kazi ya uchungaji, alipokuwa katika kuomba Mungu akamwambia “sikukuita kuwa Mchungaji, nilikuita ili uwe mwalimu hiyo ndio sababu inayosababisha unajisikia kuchoka na hiyo kazi kwa kuwa unafanya kazi ambayo sio sahihi kwako kuifanya”

Kama unafanya kazi na hauna amani na hiyo kazi, unaona hiyo kazi ni kama mzigo mzito ni dhahiri ulidandia kazi ambayo sio yako, kazi hiyo sio sahihi kwako.

Lakini kama uko mahali na unafanya kazi sahihi hata kama itafika hatua utaona imekuwa mzigo lazima Mungu atakupa msaada ili uione kazi ni rahisi.

(Kutoka 181:20)

Mungu alipooona kazi aliyompa Musa imekuwa mzigo kwa Musa, Mungu alimleta baba mkwe wa Musa ili ampe ushauri wa namna ya kutenda kazi hiyo, Musa akapata ushauri uliomsaidia kupunguza majukumu hatimaye Musa akapunguziwa mzigo ili kazi isiwe sababu ya yeye kudhoofika.

2.Kusoma shule au chuo ambacho unajisikia kuhama hapo au unasoma lakini unajisikia kuacha kusoma hiyo kozi au hayo masomo.

Ukisoma shule ambayo sio sahihi kwako au ukisoma kozi ambayo sio sahihi kwako utajikuta unaona safari ya elimu ni mateso makali sana, utasoma lakni ndani yako unajisikia kuacha shule au chuo, unaona masomo ni magumu, ukiona hali hiyo tafakari eneo ulipo au kozi au masomo unayosoma, inawezekana hauko mahali sahihi.

Ukisoma kozi sahihi hata kama ni ngumu Mungu atakusaidia na hautashindwa kwa kuwa uko mahali sahaihi, kama unasoma shule sahihi ni rahisi kumuona Mungu akijifunua hapo shuleni katika safari yako ya elimu.

3.Kama umejenga nyumba katika eneo ambalo una vita kila kona imefika hatua hauoni furaha kukaa ndani ya hiyo nyumba.

(Isaya 60:21a)

Biblia inasema “utajenga nyumba na kukaa ndani yake” maana yake ni kwamba ukijenga nyumba ambayo hauna hamu ya kuendelea kuishi ndani yake maana yake ni kwamba eneo ulilopo sio sahihi kwako, haukutakiwa kujenga hapo.

4.Kuishiwa/Kupungukiwa badala ya kuongezeka.

Ikiwa uko katika eneo Fulani na unajikuta uwepo wa Mungu unaisha ndani yako au unapungua ndani yako badala ya kuongezeka tafakari eneo ulilopo. Ikiwa unasali katika kanisa ambalo ukiwa hapo unajisikia kuchoka na safari ya kwenda mbinguni, nguvu za maombi zinapunguka n.k tafakari eneo ulilopo ila ni vema ufahamu kanisa linaweza likawa zuri kabisa kwa nje lakini ndani likawa lina shida na pia kania linaweza likawa zuri ni la kiroho kabisa lakini Mungu hajaridhia wewe uwe hapo kwa hiyo itakuwa ngumu sana kuona uwepo wa Mungu ukiwa hapo.

Ikiwa uko katika eneo ambalo hata mali zako zinaisha badala ya kuongezeka, ni muhimu ufahamu hauko mahali sahihi.

Ikiwa uko katika eneo sahihi hata biashara unayofanya Mungu ataifanya iongozeke, nguvu za kiroho lazima ziongezeke n.k.

(Zaburi 23:16)

Mfalme Daudi anasema Bwana ndiye Mchungaji wangu, sitapungukiwa na kitu. Kama hawezi kupungukiwa maana yake ni kwamba katika eneo alilopo lilikuwa eneo sahihi kwa kuwa hiyo nafasi aliyonayo ni Mungu alimpa kwa hiyo Mungu hawezi kuruhusu apungukiwe kwa kuwa Mungu yupo kumuongoza ni wapi aende apate mahitaji yake.

(Luka 15:11-13)

Huyu kijana aliondoka kwao na mali lakini alipofika eneo Fulani akajikuta anatumia zile mali kufanyia anasa na mwishowe akajikuta hata alichokuwa nacho kimeisha kwa sababu hakuwa katika eneo sahihi.

5.Kutumia vibaya kile ulichonacho au kutotumia ulichonacho.

Watu wengi hawafahamu kuwa kuna uhusiano kati ya eneo ambalo mtu yupo na matumizi ya kile alichonacho.

Kitu mojawapo kinachowafanya watu wasiwe na matumizi mazuri ya vitu walivyonavyo(mali, vipaji, karama n.k) ni kutokuwa katika eneo sahihi, kama hauko mahali sahihi ni rahisi kujikuta umetumia vibaya kile ulichonacho au kutotumia kabisa ulichonacho.

Kuna mahali unaweza ukaishi na ukajikuta akili zako hazifanyi kazi vizuri, unajikuta unashindwa kutumia akili zako vizuri, unajikuta hautumii vipawa ulivyo navyo n.k maana yake ni kwamba hauko mahali sahihi.

(Luka 15:11-14)

Huyu kijana alipokuwa kwa baba yake hatuoni akitumia mali vibaya lakini baada ya kuondoka kwa baba yake akaanza kuishi maisha ya anasa kwa kutumia mali vibaya. Alienda kuishi eneo ambalo sio sahihi kuishi akajikuta hata mali alizokuwa nazo anazitumia vibaya.

N.B ni muhimu ufahamu kuwa haina maana kwamba ukiwa katika eneo sahihi hautakumbana na changamoto, changamoto haziepukiki hata ukiwa mahali sahihi utakumbana nazo lakini maadamu uko katika eneo sahihi ni rahisi kuuona msaada wa Mungu katika hizo changamoto.

Angalizo: (1).Usiwe mwepesi wa kufanya maamuzi ya kuacha kazi, kuhama kanisa, kuhama nyumba au kuhama shule/ chuo au kubadilisha kozi bila kumuuliza Mungu kwa kuwa shetani akiona uko mahali sahihi huwa anafanya juu chini kuhakikisha anakutoa mahali hapo anaweza akakuinulia watu wa kufanya vita na wewe ili uondoke hapo pia anaweza kuchafua hali ili hali hiyo ikuondoe hapo.

                      (2).Usifanye kazi maadamu ni kazi, usijenge nyumba maadamu una uwezo wa kujenga, usisome masomo yoyote maadamu alama(marks) zako zinaruhusu kusoma hiyo kozi, ni muhimu kuhitaji maelekezo ya Mungu kwanza ili usije ukajikuta hauko mahali sahihi halafu mwisho wa siku ukajikuta hauoni msaada wa Mungu katika unachofanya.

MAMBO YANAYOWAFANYA WATU WASIWE KATIKA ENEO SAHIHI

1.Kuangalia mazingira au hali Fulani.

Kwa mfano vijana wengi hususani wanaosoma ukiwauliza kwa nini wanasoma masomo wanayosoma utasikia wakisema ni kwa sababu watu waliosoma hayo masomo wanaajiriwa sana.

Kwa hiyo wanasoma kwa kuangalia upepo unaendaje, ikitokea upepo umebadilika ghafla ndio maana wengi wanajikuta hawana ajira, wamesoma lakini ni kama hawakusoma, hiyo yote ni kwa sababu hawakuwa katika eneo sahihi.

Tabia ya kuangalia upepo unavyoenda au kuangalia mazingira imewafanya watu kuwa katika maeneo ambayo sio sahihi, kwa kufanya kazi katika maeneo yasiyo sahihi, kusoma kozi ambazo sio sahihi kwao.

(Mwanzo 13:10-13, 19:1-29)

Lutu aliangalia mazingira, akaenda akakaa kwenye eneo ambalo mwishowe liliangamizwa hatimaye akaondoka akiwa hana mali, hana mke.

2.Kutomsikiliza Mungu

(Mathayo 17:24-27)

Laiti kama Petro asingekuwa mahali sahihi asingepata fedha ya kulipia kodi, Petro alipata fedha ya kulipia kodi kwa kuwa alifuata maelekezo ya Yesu.

(Mathayo 2:13-14)

Herode alipopanga kumuangamiza Yesu, Mungu alimtuma malaika kumwambia Yusufu aondoke katika lile eneo. Laiti kama Yusufu asingefuata maelekezo aliyopewa na Mungu, yamkini Herode angeweza kumuua Yesu.

JE! MUNGU HUWA ANATOA MAELEKEZO KUHUSU ENEO SAHIHI LA WEWE KUWEPO?

Ndio Mungu huwa anatoa maelekezo ya kuhusu mahali sahihi kwa wewe kuwepo, Mungu huwa anaweza kutoa maelekezo shule ipi au chuo kipi usome, Mungu anaweza akatoa maelekezo ujenge nyumba wapi, Mungu anaweza kutoa maelekezo wapi ufanye kazi (biashara au ajira au huduma)

Soma mifano ifuatayo:-

(Mwanzo 12:1)

Mungu alimwambia Ibrahimu atoke katika hilo eneo alilopo aende katika eneo ambalo atamuonyesha kwa kuwa akikaa hapo hawezi kupata Baraka ambazo Mungu anakusudia kumpa.

Ibrahimu alipochukua hatua ya kuondoka hapo akaenda mahali ambapo Mungu alimuelekeza, Ibrahimu alipokea Baraka za Mungu kwa kiwango kikubwa sana.

(Matendo ya mitume 1:4)

Yesu aliwaambia wanafunzi wake wasitoke Yerusalemu mpaka watakapopokea uwezo utokao juu, wasitoke Yerusalemu bila kujazwa Roho Mtakatifu, kwa kuwa endapo wataondoka hapo bila huo uwezo watajikuta hawafanyi kitu chenye matokeo katika huduma aliyokusudia waifanye.

(Waamuzi 6:24-26)

Mungu alimwambia Gideoni mahali sahihi ambapo anatakiwa kujenga madhabahu. Tunachojifunza hapa ni kwamba unaweza ukajenga madhabahu katika eno ambalo Mungu hajakuagiza kujenga, tunaona Gideoni alipotokewa na malaika wa Mungu Gideoni alijenga madhabahu(Waamuzi 6:24) lakini Mungu alikuja kumpa maelekezo ya kujenga madhabahu katika eneo ambalo Mungu ameliridhia.

Tunapotazama nyakati za leo watumishi wengi wamekuwa na viwango vya chini vya kumsikiliza Mungu, wengi wanapojenga makanisa, wanajenga ili mradi wawe na mahali pa kuabudia badala ya kufuata maelekezo ya Mungu ili wajenge kwenye eneo sahihi.

HITIMISHO

Kwa hayo machache naamini kuna kitu Mungu amekipanda ndani yako, ni ombi langu Mungu akupe hatua ya kutendea kazi fundisho hili ili uwe katika eneo sahihi hatimaye iwe rahisi kupata msaada wa Mungu n.k