UHUSIANO WA THAMANI YAKO MBELE ZA MUNGU NA MAISHA YAKO

(Isaya 43:4)

Unaposoma andiko hilo utaona Mungu anasema atatoa watu kwa ajili yako na kabila za watu kwa ajili ya maisha yako ila amesema na sababu itakayomfanya atoe watu kwa ajili yako ni “THAMANI” kwa hiyo kwa andiko hilo tunapata kujua kuwa thamani uliyonayo kwa Mungu ndio inamfanya Mungu akuinulie watu wa kusimama na wewe katika maeneo mbalimbali, kumbuka kama wewe ni mfanyabiashara unahitaji watu(wateja), kama wewe ni Mchungaji unahitaji watu(washirika) kwa hiyo kila mtu kuna aina ya watu anaowahitaji kulingana na mazingira fulani.

SWALI: Je! una thamani kiasi gani mbele za Mungu?

Kila mwanadamu anapendwa na Mungu na kila mwanadamu ana thamani mbele za Mungu lakini thamani inazidiana kati ya mtu na mtu na hata upendo wa Mungu juu ya watu huwa unatofautiana kati ya mtu na mtu na ukitaka kuamini hili soma biblia yako kwenye kitabu cha (Danieli 10:11) utaona Danieli sanaambiwa kuwa yeye ni mtu apendwaye sana. Nikupe mfano huu juu ya thamani, ninajua una nguo tofautitofauti na katika nguo hizo kuna nguo ambazo unazipenda sana kuliko zingine na si ajabu hata zikichafuka huwa unazifua kwa kutumia sabuni ya unga na sio sabuni ya mche, na si ajabu hata ukizianika nguo hizo huwa unaweka na vibanio ili zisianguke chini kwenye uchafu, na si ajabu unapozivaa huwa unabadilisha na muondoko, na si ajabu unapozivaa nguo hizo huwa hupendi kuguswaguswa na nina uhakika huwa hauzivai mara kwa mara na nina huwa kuna siku maalumu za kuvaa nguo hizo kutegemeana na mahali unapokwenda na nina uhakika huwa ukizifua hizo nguo huwa unaziweka ndani ya begi, Lakini kuna nguo ambazo huwa unashindia au huwa unazivaa ukiwa upo nyumbani. Kinachokufanya ufanye mambo hayo yote ni kitu kinachoitwa “THAMANI” thamani ya nguo ndio inaipa nguo heshima na inaifanya ngu ipendwe kuliko zingine na hata uanpokwenda kununua nguo kwenye mnada utakuta kuna nguo za mitumba na nguo ambazo si mitumba (special) japo zote ni nguo lakini utakuta bei zinatofautiana, na hata kwenye mitumba utakuta na yenyewe inazidiana bei kutegemeana na daraja(grade) la nguo hiyo na ndio maana kuna mitumba daraja la kwanza, daraja la pili n.k kinachosababisha hayo yote ni kitu kinaitwa ‘THAMANI” kwa hiyo huwezi ukatenganisha THAMANI, HESHIMA NA UPENDO kwa kuwa kitu chochote chenye thamani kinapendwa na kinaheshimiwa(Isaya 43:4)

Nimeona matangazo na machapisho mbalimbali yanayofundisha namna ya kuongeza thamani yako katika kazi au biashara, watu wengi wanaofundisha mambo hayo hufundisha kulingana na uzoefu au elimu zao, sio vibaya kujifunza ila ukumbuke hiyo ni hekima ya dunia hii na sio ishukayo kutoka juu kwa hiyo kuna uwezekano wa kuyafanyia kazi hayo wanayoyafundisha na usione matokeo kwa kuwa ni hekima ya dunia hii.

Suala la kuongeza thamani yako kwa Mungu ni suala nyeti sana na limo ndani ya biblia na kutokana na hilo nami napenda kuzungumzia mambo kadhaa yatakayokufanya uongeze thamani yako kwa Mungu, kumbuka “ukiongeza thamani yako kwa Mungu, Mungu anakuletea watu unaowahitaji katika eneo Fulani.

Yafuatayo ni mambo yatakayofanya thamani yako iongezeke kwa Mungu

1.Yesu kuwa ndani yako(kuokoka)

(Ufunuo 3:20)

Je! wewe unayesoma kitabu hiki umeokoka au bado? Kama haujampokea Yesu ni vema ujue kuwa thamani yako ni ndogo sana mbele za Mungu na ndio maana Mungu anakuchukulia kuwa mtu wa kawaida na tena ameandaa mahali ambapo atawaweka watu wote wanaomkataa Yesu, Thamani yako itaongezeka pale ambapo utampokea Yesu moyoni mwako na kumkubali atawale maisha yako.

2.Tembea katika kusudi la Mungu

Nianze kwa kukuuliza swali je! unajua kwa nini Mungu alikuumba?

Watu wengi wanamtumikia Mungu lakini ni wachache wanaomtumikia Mungu sawasawa na kusudi lake kwa hiyo hata Baraka ambazo watu wengi wanazipata ni Baraka za jumla kumtumikia Mungu ambazo mtu yeyote anaweza kuzipata, mtu yeyote anayemtumikia Mungu haijalishi anamtumikia Mungu ndani ya kanisa, serikalini n.k.

Kuna Baraka ambazo mtu huzipata anapokuwa akimtumikia Mungu katika kusudi lake, hizi ndizo Baraka maalumu zinazomtofautisha mtu mmoja na mwingine lakini watu wengi hawazipati hizi kwa kuwa wanamtumikia Mungu nje ya kusudi lake..

Watu wengi na hata waliookoka wamejikuta wakiishi maisha yasiyo na raha kwa kuwa hawalijui kusudi la kuumbwa kwao, wamebaki na Yesu lakini hawamtumikii Yesu kulingana na matakwa ya Yesu, kumbuka kupitia Yesu kila kitu kiliumbwa(Wakolosai 2:16) kwa hiyo unapookoka lazima ujue ni kwa nini uliumbwa na usipojua kwa nini uliumbwa utabaki na wokovu lakini hautaona raha ya wokovu kwa kuwa utakuwa unatembea nje ya mpango wa Mungu na ukitembea nje ya mpngo wa Mungu maana yake ni kwamba unakuwa hauna nafasi kwenye bajeti ya Mungu na si ajabu hata ukiomba badala ya Mungu kukupa unachotaka, Mungu  anakutumia neno lake ili likurejeshe kwenye nafasi ili upate msaada na ukitaka kuamini hili kasome biblia utaona Daudi anasema katika shida yangu nalimwita Bwana na Bwana alichofanya ni “kumuweka panapo nafasi”(Zaburi 118:5) maana yake ni kwamba Mfalme daudi alipitia shida kwa kuwa alikuwa nje ya nafasi(kusudi la Mungu) alipoamua kuomba msaada wa Mungu ilibidi kwanza Mungu amrudishe kwenye nafasi(kusudi) na ndipo amsaidie.

(2 Wakorintho 7:5-6)

Ukisoma andiko hilo utaona Paulo alipofika makedonia alijikuta yuko katika dhiki kubwa sana kwa kuwa alikuwa kwenye mazingira ya hatari na kwa kuwa alikuwa anatumikia kusudi la Mungu, Mungu alimleta Tito ili kuwafariji katika dhiki hizo, kilichomfanya Mungu amlete Tito Makedonia ni thamani ya watumishi wake waliokuwa makedonia.

3.Weka maarifa ndani yako

(Malaki 2:7)

Kila mtu ambaye ameokoka amefanyika kuhani kwa Mungu kupitia damu ya Yesu(Ufunuo 5:9-10) kwa hiyo kama biblia inamtaka kuhani ahifadhi maarifa ni kwa sababu watu wanayatafuta maarifa yatakayowasaidia kufanya mambo mbalimbali, kumbuka huwezi kutafutwa au kufuatwa na watu kama hawajaona kitu ndani yako kwa hiyo thamani yako inaongezwa na vitu vilivyomo ndani yako, unapoongeza maarifa ya kiMungu ndani yako na thamani yako kwa Mungu inaongezeka.

4.Uaminifu

Uaminifu ndio unamfanya mtu kuwa mwaminifu, hata wewe na mimi tunahitaji watu waaminifu na hata Mungu pia anahitaji watu waaminifu nan i vema ujue kadri uaminifu wako kwa Mungu unavyoongezeka ndivyo na thamani yako kwa Mungu inaongezeka.

(Hesabu 12:6-9)

Ukisoma andiko hilo utaona Mungu akiwashughulikia akina Haruni na Miriamu kwa kuwa walianza vchokochoko dhidi ya Musa, Mungu aliwashughulikia kwa sababu ya thamani ya Musa mbele zake na tena akawaambia kuwa Musa ni mwaminifu kwa hiyo tunapata kujua kuwa Mungu anatahmini sana watu waaminifu kwa gharama zote na hayuko tayari kuwapoteza watu waaminifu kwake.

5.Tembea kwenye agano

(Isaya 43:1-4)

Thamani ya taifa la Israeli ni kubwa sana hata leo na hata mpaka ukamilifu wa dahari kwa kuwa ni taifa la agano kwa hiyo thamani ya taifa la Israeli haitaweza kupungua mbele za Mungu kwa kuwa ni taifa la agano ndio maana Mungu anawaambia kuwa wao ni wa thamani na wa kuheshimiwa na kwa sababu ya thamani yao amewapenda. Ni vema ufahamu kuwa ukitembea ndani ya agano tahamani yako inakuwa kubwa sana mbele za Mungu na ndio maana kati ya mambo ambayo Mungu amayazuia ni pamoja na kuvunja maagano na yeye kwa kuwa unapovunja agano na Mungu unapoteza thamani yako kwa Mungu kwa kuwa yeye ni Mungu ashikaye magano.

Labda unaweza ukauliza nini maana ya agano? Jibu rahisi ni kwamba agano ni mapatano kati ya mtu na mtu au kati ya mtu na Mungu, kwa mfano watu wanapofunga ndoa wanakuwa wameingia kwenye agano na ikitokea ndoa imekufa maana yake ni kwamba agano limevunjika na ukifuatilia utakuta hao watu wanachukiana kupita kawaida kwa kuwa agano linapovunjika na thamani ya uliweka naye agano inapotea.

6.Utii

(Isaya 1:18-19)(Kutoka 19:1-9)

Ni vema ujue kuwa watu wote ambao huwa wanatii kile ambacho Mungu anakisema thamani yao huongezeka, yaani kadri unavyoongeza utii wako kwenye neno la Mungu ndivyo na thamani yako inavyoongezeka mbele za Mungu na kadri unavyoacha kutii neno la Mungu na ndivyo thamani yako inapungua kwa Mungu, kumbuka kutii ni bora kuliko dhabihu na kuasi ni kama dhambi ya uchawi(1 Samweli 15:22-23)

Kumbuka unapotii neno la Mungu maana yake ni kwamba unajifungulia njia ya kula mema ya nje nchi lakini usipotii unajifungulia mlango wa kuangamia.

7.Uhusiano wako na Mungu

(Mithali 8:17)

Uhusiano wowote mzuri huwa unaanza na kutambua thamani, kwa hiyo huwezi kuwa na uhusiano mzuri na mtu au na Mungu kama haujatambua thamani yake kwako hivyo basi huwezi kumpenda Mungu kama hautambui thamani ya uwepo wa Mungu kwako, yeye(Mungu) amesema kuwa anawapenda wale wanaompenda na wale wanaomtafuta kwa bidii watamuona maana yake ni kwamba anawatahamini wanaomthamini kwa kuwa wale wanaomthamini ndio wanaomtafuta kwa kuwa wamejua umuhimu wake katika maisha yao kwa hiyo ukiona mtu anakuwa mgumu kumtafuta Mungu maana yake ni kwamba haoni thamani ya Mungu katika maisha yake.

Uhusiano wako na Mungu unakufanya uongeze thamani yako na Mungu, hivyo basi kadri uhusiano wako na Mungu unavyoongezeka na thamani yako kwa Mungu inaongezeka na thamani yako kwa Mungu inapoongezeka, Mungu hatashindwa kukuinulia watu wa kusimama pamoja na wewe kwenye mambo mbalimbali.

8.Kuwa na siri za Mungu

Jaribu kufikiria watu ambao wana siri zako, nina uhakika hao watu unawathamini sana ili wasije kuvujisha hizo siri mahali ambapo hutaki siri zako zivuje. Na Mungu vivyo hivyo anapoweka siri zake kwa mtu ghafla huyo mtu anaongezeka thamani mbele zake na Mungu anakuwa tayari kumlinda mtu huyo kwa gharama zozote, na sikuzote siri za Munguziko kwao wanaomtafuta Mungu ukiona mtu amejikita kumtafuta Mungu ni vema ujue hata ulinzi wake ni ulinzi wa hali ya juu sana,, na hapa nataka nikutafakarishe, hapa duniani mifumo ya ulinzi huwa inatofautiana kutegemeana na kile ambacho kinalindwa, kwa mfano huwezi ukalinganisha ulinzi uliopo benki na ulinzi walionao wafanyakazi wa benki, wafanyakazi wa benki wanakuwa kwenye usalama wa kutosha wanapokuwa ndani ya benki lakini wanapotoka eneo la kazi ulinzi waliokuwa nao kule benki unapungua kwa kuwa kilichowafanya wawe kwenye usalama wa kutosha ni zile fedha zilizomo na zinazoingia ndani ya benki ambazo wao huzipokea, hata ulinzi wa Mungu juu ya watu unatofautiana kutegemeana na mtu husika yukoje mbele za Mungu, kinachomfanya mtu anakuwa na ulinzi mkubwa wa Mungu ni thamani yake mbele za Mungu.

(2 Wafalme 6:8-17)

Ukisoma andiko hilo utaona Mfalme wa shamu alikuwa akifanya vita na taifa la Israeli lakini mikakati yake yote ilifunuliwa na Mungu kupitia mtumishi wa Mungu Nabii Elisha, Mfalme wa shamu alipojua kuwa kuna mtu anavujisha mambo yake ya siri aliandaa jeshi kubwa kwenda kumshughulikia Elisha lakini hawakujua kuwa Mungu alikuwa amemuwekea Elisha ulinzi mkubwa sana na lile jeshi lilipofika kwa Elisha mwishowe walijikuta wamepigwa upofu na wakajikuta wako kwenye kambi ya wana wa Israeli. Elisha aliwekewa ulinzi mkubwa kiasi hicho Kwa sababu ya THAMANI yake mbele za Mungu kwa kuwa ni mtu ambaye alikuwa amebeba siri nyingi za Mungu kwa hiyo Mungu hakuruhusu mtu yeyote amguse.