KUISHI KWA IMANI

Huwezi ukatenganisha mafanikio na suala la kuamini kwa kuwa kila aliyefanikiwa kuna kitu alikiamini na anaendelea kukiamini haijalishi ni cha kiungu au cha kishetani.

Biblia inasema kuwa imani ni kuwa ni hakika ya mambo yatarajiwayo nan i bayana ya mambo yasiyoonekana (Waebrania 11:1).

Ni vema kila mtu ajue kuwa kila mtu ambaye amefanikiwa aliamini jambo Fulani na akaingia kutendea kazi kile alichokiamini na hatimaye akafanikiwa, nawe unapohitaji kufanikiwa katika jambo lolote lazima uamini kwanza kuwa hilo jambo utaliweza na kama hauamini kuwa utaliweza hilo jambo hata ufanyeje hautaliweza kamwe kwa kuwa “aonavyo mtu nafsini mwake ndivyo alivyo” kwa hiyo kushinda au kushindwa huwa hakuanzii kwenye mazingira ya nje bali huwa kunaanzia ndani ya mtu; anaamini nini, anawaza, anakiri nini na anatenda nini.

Imani yoyote haijalishi ni imani kwa Mungu au kwa shetani inajengwa na mambo makuu matatu (Warumi 10:17)

1.Kusika

2.Neno

3.Aliyesema hilo neno

Kwa hiyo ikiwa unahitaji kufanikiwa katika jambo lolote lazima ujifunze kwa Mungu pekee kwa kuwa Baraka zake zinatajirisha wala hazijachanganywa na huzuni ndani yake, lazima usikie neno la Mungu linasema nini juu ya hicho kitu unachotaka kukifanya na pia lazima utendee kazi hilo neno ulilosikia.

Kwa nini uishi kwa imani?

1.Imani ina uwezo wa kuamua ufanye jambo au mambo kwa viwango gani

Je! unataka kila unachokifanya kifanyike katika ubora wa hali ya juu?

Ikiwa umejibu ndio katika hilo swali soma biblia yako kwenye kitabu cha (Waebrania 11:4) ukisoma andiko hilo utaona kuwa kwa imani Habili alimtolea Mungu dhabihu iliyo bora.

Biblia inataka ufahamu kuwa imani iliyokuwemo ndani ya Habili ndio iliyoifanya sadaka yake ikawa bora mbele za Mungu kwa hiyo kwa andiko hilo tunapata kujua kuwa imani itakufanya ufanye mambo katika ubora.

        2.Imani inaweza ikakufanya ukawazidi waliokutangulia au wanaokuzudi

(Waebrania 11:4) ukisoma andiko hilo utaona kuwa Habili alimzidi Kaini kwenye ubora, Kumbuka Kaini ndiye kaka wa Habili na uwe na uhakika kuwa Kaini alianza kumiliki mali kabla ya Habili lakini walipokwenda mbele za Mungu Habili alimzidi Kaini ubora japo wote walitoa lakini ubora ulizidiana.

Nataka nikupe changamoto hususani kama unafanya biashara, mnaweza mkawa mnafanya biashara ya aina moja na kwenye eneo moja wewe na watu wengine lakini ambaye bidhaa yake itaonekana kuwa na ubora kuliko nyingine ndio bidhaa itakayonunuliwa, ninachotaka ujue ni kwamba kazi mojawapo ya imani ni kuweka ubora kwenye kila ambacho unakifanya hata kama ni kidogo kiasi gani.

      3.Imani inaweza ikakuhamisha(ikakuinua) kutoka hapo ulipo na kukupeleka eneo lingine

(Waebrania 11:5)

Biblia inasema kuwa imani aliyokuwa nayo Henoko ilimfanya Mungu amuhamishe ili asije akafa, kwa hiyo kwa andiko hilo tunapata kujua kuwa imani inaweza ikakufanya utoke eneo moja kwenda lingine.