je! unahitaji kuwa mishenari?

Na. Faraja Gasto

Utangulizi

Kuna umishenari unaohusisha mtu mmoja (Mwanzo 6:13-22)(Yona 1:1-2) na kuna umishenari unaohusisha kundi la watu kadhaa (Nehemia 4:13-14). Ukisoma maandiko hayo utaona umishenari ukitajwa hapo.

Somo hili ni kwa ajili ya watu wote wenye maono ya kuwa mishenari watakaoongoza makundi katika kufanya umishenari katika maeneo mbalimbali.

àKila mishenari anatakiwa kuyajua mambo haya ya msingi kuhusu umishenari, katika somo hili tutajifunza mambo kadhaa kuhusu umishenari kutoka kwa Bwana wetu Yesu Kristo.

Mambo ya msingi ambayo kila mishenari anatakiwa kuyafahamu

1.Tafuta watu unaotaka kufanya nao kazi unayokusudia kuifanya.

(Mathayo 4:18-21)

àYesu aliwafuata watu aliotaka kufanya nao kazi , kwa hiyo unapokuwa mishenari lazima uwatafute watu unaotaka kuwa nao, Yesu hakufanya maombi ya kuwavuta waje bali alipotoka kwenye maombi alianza kuwafuata watu ambao anawataka.

2.Waambie aina ya kazi wanayokwenda kuifanya.

(Mathayo 4:18-19)

àYesu aliwaambia wamfuate kwa kuwa anataka kuwafanya kuwa “wavuvi wa watu” kwa hiyo Yesu alipowatafuta watu aliotaka kufanya nao kazi aliwaambia aina ya kazi ambayo anataka waifanye.

3.Waandae kwa ajili ya kazi iliyoko mbele yao.

(Mathayo 4:18-19)

àYesu alipowatafuta watu anaotaka kuwa nao na akawaambia aina ya kazi anayotaka waifanye, Yesu alianza kuwaandaa kwa ajili ya kazi iliyoko mbele yao ndio maana Yesu aliwaambia “NITAWAFANYA” neno hilo kuwafanya maana yake ni kuwaandaa/kuwatengeneza kwa ajili ya kazi iliyoko mbele yao. Wanafunzi wa Yesu walikuwa hawajui maana ya kuwa “wavuvi wa watu” ni nini na watu wanavuliwaje, kwa hiyo ilimpasa Yesu awaandae kwanza, kuwaandaa kulihusisha kuwapa uelewa wa kutosha juu ya ile kazi na namna ya kuifanya.

Kwa mfano kama unataka kuanzisha kundi linalokusudia kupambana na rushwa, lazima kwanza wanakikundi wajue rushwa ni nini, madhara ya rushwa ni yapi, faida za kutopokea rushwa ni zipi n.k.

4.Usiwe na watu wa aina moja katika kundi.

(Mathayo 4:18-22)

àYesu alikuwa na wanafunzi waliokuwa wakijishughulisha na mambo mbalimbali kwa mfano Mathayo na Lawi walikuwa watoza ushuru (Marko 2:14)(Mathayo 9:9). Petro, Andrea na wengine walikuwa wavuvi (Mathayo 4:18-22).

Unapokuwa na watu wa aina tofautitofauti inalifanya kundi kuwa na watu wenye uwezo wa kufanya kazi mbalimbali.

Tunajifunza kwa Mfalme Sulemani alipokuwa akitaka kujenga hekalu, alitafuta watu wenye ujuzi mbalimbali; wataalamu wa kuchora, kuchonga, kujenga n.k.

5.Wape nafasi ya kutendea kazi kile unachotaka wakifanye (usifanye peke yako)

(Luka 10:117-20)

Yesu hakuishia kuwaanda/kuwafundisha bali aliwapa nafasi ya kutendea kazi kile ambacho aliwafundisha, aliwaacha waende kule alikokuwa anataka yeye aende, hiyo yote ilikuwa ni kuwapa nafasi watendee kazi kile alichowafundisha na waliporudi walileta ripoti ya kazi waliyokwenda kufanya.

6.Waamini watu unafanya nao kazi.

(Luka 10:1)

Yesu aliwapa wanafunzi wake jukumu ambalo alitakiwa kulifanya yeye mwenyewe, tunachojifunza kwa Yesu ni kwamba alipowafundisha wanafunzi wake aliwaamini kuwa wanaweza kufanya kile alichowafundisha ndio maana aliwapa nafasi ya kutekeleza majukumu aliyotakiwa kuyatekeleza.

7.Lazima ufikiri kuhusu mahitaji ya kimwili ya watu unaofanya nao kazi(maisha yao ya kila siku)

(Mathayo 17:24-27)

Kumbuka watu unaofanya nao kazi ni wanadamu kama wewe na wana mahitaji yao ya kila siku, kwa hiyo unapokuwa mishenari unayeongoza kundi lazima ufikiri kuhusu maisha ya watu(usitawi) unaofanya nao kazi.

Petro alipokuwa anadaiwa kodi alienda kwa Yesu, Yesu akampa mbinu ya kupata fedha za kutatua tatizo alilokuwa nalo. Yesu hakumpa Petro majibu ya matumaini bali Yesu alimpa Petro mbinu ya kupata fedha.

8.Waonyeshe faida watakayopata wanapofanya kazi hiyo.

(Mathayo 19:27-29)

Yesu aliwaambia wanafunzi wake kuwa faida watakayopata katika kufanya kazi anayotaka waifanye ni kwamba watapata mara mia katika ulimwengu huu na katika ulimwengu ujao watapata uzima wa milele. Tunachojifunza hapo ni kwamba watu unaofanya nao kazi wanapojua faida ya kazi ambayo wanaifanya watakuwa na hamasa(motivation) ya kufanya hiyo kazi.