DHAHABU ILIYO SAFI NI ILE ILIYOPITISHWA MOTONI

Na Mwl.Dorcas Simon

Evangelical Holy Pentecostal Church of Tanzania(Mwanza)

UTANGULIZI

Dhahabu iliyo safi ni ile iliyopitishwa motoni maana yake ni Mkristo anayestahili kuingia Mbinguni ni Yule aliyepitishwa kwenye majaribu.

Siku zote mtu hujaribiwa kwa vitu anavyovijua kwa kuwa hakuna kitu kipya duniani.

MGAWANYIKO WA SOMO

Somo hili limegawanyika katika sehemu kuu tatu

v Majaribu yanayotolewa na MUNGU.

v Majaribu yanayotolewa na shetani.

v Majaribu yanayosababishwa na mtu             mwenyewe.

Msitari wa kukumbuka: (Zaburi 34:19)

                    ‘’Mateso ya mwenye haki ni mengi, Lakini Bwana humponya nayo yote’’.

Kweli kuu ya somo: (1 Wakoritho 10:13)

‘’Jaribu halikuwapata ninyi, isipokuwa lililo kawaida ya wanadamu; ila Mungu ni mwaminifu; ambaye hatawaacha mjaribiwe kupita mwezavyo; lakini pamoja na lile jaribu atafanya na mlango wa kutokea, ili mweze kustahimili’’.

MAJARIBU: Ni vipindi tofauti ambavyo ni vigumu, vinavyoleta shida, dhiki, tabu n.k

Siku zote jaribu huwa haliangalii tajiri au maskini bali jaribu linaweza likampata mtu yeyote.

Japo majaribu ya aina hizi tatu yanaweza kufanana lakini matokeo yake huwa ni tofauti.

Mtu yeyote ambaye ameokoka haijalishi ni tajiri au maskini wakati wake ukifika lazima ajaribiwe tu  kwa mfano mtu akiwa na mali jaribu linaweza likaja kupitia ndugu zake wakamuinukia au mke wake anaweza akamuinukia na hivyo akawa jaribu kwake. Mtumishi wa MUNGU Yakobo japo alikuwa ni tajiri sana lakini alikiri kuwa siku zake zote zilikuwa za taabu.

                      Yusufu akamleta Yakobo babaye ndani akamweka mbele ya Farao Yakobo akambariki Farao, Farao akamwuliza Yakobo, Je! Siku za miaka ya maisha yako ni ngapi? Yakobo akamjibu Farao, Siku za miaka ya kusafiri kwangu ni mia na thelathini; siku za miaka ya maisha yangu zimekuwa chache, tena za taabu, wala hazikufikilia siku za miaka ya maisha ya baba zangu katika siku za kusafiri kwao.(Mwanzo 47:7-9)

JAMBO LA KUELEWA: Watu wengi wanapopitia kwenye jaribu Fulani huwa wanakosa hekima ya kupambanua kipi ni chanzo cha jaribu wanalolipitia   Je ni jaribu lililoruhusiwa na MUNGU?

                           Je ni jaribu lililoachiliwa na shetani?

                           Je ni jaribu lililosababishwa na mtu mwenyewe?

JINSI YA KUPAMBANUA CHANZO CHA JARIBU

v Jaribu linaloachiliwa na MUNGU huwa linamvuta mtu achukue hatua za kumtafuta BWANA na huwa halipiti uwezo wa mtu kulistahimili au kulivumilia.

v Jaribu linaloletwa na shetani huwa linakuja na msukumo wa kuchukua maamuzi ya haraka sana na mwishowe mtu hujikuta amemtenda MUNGU dhambi kwa mfano shetani alimtumia mke wa Ayubu ili ampate Ayubu, mke wa Ayubu alimwambia Ayubu mkufuru MUNGU ufe lakini Ayubu alikataa, kitu alichokuwa anakitaka shetani ni kumfanya Ayubu atoe maamuzi ya kumkufuru MUNGU mwishowe afie dhambini.

v Jaribu linalosababishwa na mtu mwenyewe huwa linasababishwa na tama juu ya kitu Fulani na kutokana na tama hiyo mtu hujikuta katika shida.

Japo kuna neema kidogo kwa baadhi ya watu na neema hiyo huwafanya wasipitie jaribu la aina yoyote kwa mfano mtu amemkiri YESU na baada ya hapo akafariki hivyo basi moja kwa moja roho ya mtu huyo huenda mbinguni na mtu huyo anakuwa hajapitia jaribu la aina yoyote.

OMBI LETU SISI: Mungu usitutie majaribuni (Mathayo 6:9-13) (Luka 11:2-4). YESU alipowafundisha wanafunzi wake kuwa wamwombe MUNGU asiwatie majaribuni alikuwa anamaanisha kuwa shetani naye huleta majaribu hivyo wamwombe MUNGU asiruhusu wapiti majaribu yanayoletwa na adui yetu shetani.

Wakati Fulani MUNGU alimtoa Lutu katika eneo ambalo adhabu ilikuwa imeamriwa (Sodoma na Gomora) kwa sababu Lutu alikuwa mtu mwenye haki hivyo tunajifunza kuwa mahali Fulani wakiwepo watu wenye haki watu wa eneo hilo huwa wanapata neema kupitia wenye haki hao.

KWELI KUU YA SOMO

(1 Wakorintho 10:13-22)

Wakorintho walipojaribiwa waliona jaribu lile kuwa kubwa kupita uwezo wao wa kustahimili/kuvumilia lakini Mtume Paulo aliwaandikia waraka kuwa jaribu wanalopitia lilikuwa la kawaida na ndilo lilikuwa la uwezo wao na wangeweza kulistahimili.

MTAZAMO POTOFU WALIONAO WAKRISTO JUUYA MAJARIBU

Wakristo wengi wana mtazamo potofu juu ya majaribu kwani wengi hudhani jaribu ni lile linalochukua muda mrefu jambo ambalo si kweli kwani jaribu linaweza likachukua sekunde kadhaa, dakika, masaa, siku ,mwezi/miezi na hata mwaka/miaka.

Yusufu aliingia kwenye jaribu la kufanya uasherati na mke wa bwana wake (his boss’s wife) kwa dakika kadhaa na akalishinda jaribu hilo.

SEHEMU YA KWANZA

MAJARIBU YANAYORUHUSIWA NA MUNGU

Mungu anaporuhusu jaribu Fulani huwa lina muda wa kuanza na wa kuisha na ule muda wa kuisha jaribu ndio ambao huitwa mlango wa kutokea kwenye jaribu.

Wakati wa Mungu kumtoa mtu kutoka kwenye jaribu ukifika hata kama mtu huyo alikuwa amekata tama Mungu huwa anaachilia msukumo kwa mtu huyo ili aanze kumtafuta Bwana na baada ya hapo Mungu humtoa mtu huyo kutoka kwenye jaribu hilo.

Kama Mungu ameruhusu jaribu limpate mtu kwa muda Fulani ikiwa muda huo haujafika mtu huyo hawezi kutoka kwenye jaribu hilo hata afannye nini lakini Mungu mwenyewe ndiye ambaye humtoa mtu huyo kwenye jaribu hilo.

(1 Wakorintho 10:13-22) Wakorintho walipotafuta njia ya kujitoa kutoka kwenye jaribu walijikuta wameangukia kwenye ibda ya sanamu.

SWALI LA KUJIULIZA: Je unapojua jaribu limetoka kwa Bwana huwa unalipokeaje?

           ‘’Ndugu zangu, hesabuni ya kuwa ni furaha tupu, mkiangukia katika majaribu mbalimbali;(Yakobo 1:2)

Wewe kama mkristo unapojaribiwa lazima ulipokee jaribu kwa furaha hata kama linaumiza kwa kuwa ukilipokea jaribu kwa uchungu hata maombi yako yatakuwa ya uchungu na utamwona Mungu kama amekuonea.

LENGO LA MUNGU KUACHILIA MAJARIBU

Mungu anaporuhusu majaribu huwa ana malengo au makusudi matatu makuu.

v Anataka kuiona imani yetu.

v Anataka kuona upendo wetu kwake.

v Anataka kuona uvumilivu wetu.

MUNGU HUTAKA KUONA IMANI YETU

(1 Petro 1:6-9) (Kutoka 15:1    ) (Kutoka 16:1    )

Wakati wana wa Israeli wanatoka Misri kwenda Kanaani ilikuwepo njia ya karibu ambayo ingewafanya kufika mpema Kanaani lakini Mungu aliwapitisha njia ya kwenye jangwa ili aione imani yao juu ya majaribu aliyoyaruhusu ya wapate lakini mara zote walipokosa nyama, maji n.k waliishia kumnung’unikia Musa na Mungu, hivyo basi wana wa Israeli walikuwa watu wa tabia ya mwilinikwani walitanguliza hasira na mitazamo potofu dhidi ya Musa na Mungu hivyo waliishia kunung’unika na mwishowe wengi waliangamizwa kwa kuwa walipopitia majaribu walisahau kuwa ni Mungu aliyeigawanya Bahari ya Shamu wakavuka.

Hivyo nasi twatakiwa kujifunza kuwa tunapopitia majaribu mbalimbali tusiwe wepesi kumnung’unikia Mungu bali tunatakiwa tukumbuke mambo ambayo Mungu alikwisha kutufanyia na mwisho tujenge imani kwa Mungu na tusonge mbele kumwamini Mungu.

MUNGU HUTAKA KUONA UPENDO WETU KWAKE

                      Ikawa baada ya mambo hayo Mungu alimjaribu Ibrahimu, akamwambia, Ee Ibrahimu! Naye akasema, Mimi hapa.Akasema, Umchukue mwanao, mwana wako wa pekee, umpendaye, Isaka, ukaende zako mpaka nchi ya Moria, ukamtoe sadaka ya kuteketezwa huko juu ya mlima mmojawapo nitakaokuambia.Ibrahimu akaondoka alfajiri, akatandika punda wake, akachukua vijana wawili pamoja naye, na Isaka mwanawe, akachanja kuni kwa ajili ya hiyo sadaka ya kuteketezwa, akaondoka, akaenda mpaka mahali alipoambiwa na Mungu.(Mwanzo 22:1-3)

Mungu alikuwa hamhitaji Isaka bali Mungu alikuwa anataka kuona upendo wa Ibrahimu dhidi yake.

SWALI LA KUIJULIZA: Je pale ambapo Mungu anatujaribu kwa kumtaka Isaka wetu au Mungu anapotujaribu juu ya yale mambo tunayoyathamini je huwa tunaonyesha kumpenda Mungu tu au?

MUNGU HUTAKA KUONA UVUMILIVU WETU

Tunajifunza kwa mtu wa Mungu Ayubu pale alipojaribiwa alionyesha kuwa yeye ni mvumilivu na mwishowe Mungu alimbariki maradufu.

Hata katika maombi yetu tunatakiwa kuwa wavumilivu sana kwa sababu wakati mwingine Mungu huwa anaacha kujibu kwa makusudi ili aone uvumilivu wetu.

                          Akawaambia mfano, ya kwamba imewapasa kumwomba Mungu sikuzote, wala wasikate tamaa. Akasema, Palikuwa na kadhi katika mji fulani, hamchi Mungu, wala hajali watu.  Na katika mji huo palikuwa na mwanamke mjane, aliyekuwa akimwendea-endea, akisema, Nipatie haki na adui wangu.  Naye kwa muda alikataa; halafu akasema moyoni mwake, Ijapokuwa simchi Mungu wala sijali watu, lakini, kwa kuwa mjane huyu ananiudhi, nitampatia haki yake, asije akanichosha kwa kunijia daima. Bwana akasema, Sikilizeni asemavyo yule kadhi dhalimu. Na Mungu, je! Hatawapatia haki wateule wake wanaomlilia mchana na usiku, naye ni mvumilivu kwao? Nawaambia, atawapatia haki upesi; walakini, atakapokuja Mwana wa Adamu, je! Ataiona imani duniani? (Luka 18:1-8)

AMBACHO HUTOKEA PALE WATU WANAPOINGIA MAJARIBUNI

Watu wengi wanpokuwa katika vipindi vya majaribu huwa wanamtenda Mungu dhambi kama vile wana wa Israeli walivyokuwa wakimtenda Mungu dhambi kutokana na majaribu ndivyo ilivyo hata leo kwani watu wengi humtenda Mungu dhambi pale wanapoingia kwenye majaribu kwa mfano utakuta mtu ameingia katika jaribu la kukwama kiuchumi na inafika hatua mpaka watoto wake wanashindia uji tu utakuta mtu huyo anakwenda kuomba msaada kwa jirani yake ili apewe unga kwa kusudi la kuwapikia watoto wake na akifika kwa jirani utakuta anamwambia kuwa watoto wake walilala njaa lakini kumbe walilala wamekunywa uji hivyo mtu huyo anakuwa tayari ametenda dhambi ya uongo akiwa kwenye jaribu.

Kwa mfano mtu anakwenda dukani na inatokea muuzaji anamzidishia pesa yaani unakuta mtu anakwenda dukani akiwa na shilingi 500/= na ananunua kitu cha shilingi 300/= na muuzaji kwa kujisahau anamrudishia shilingi 2000/= kwa kudhani kuwa alipewa shilingi 5000/= na utakuta watu wengi wanachukua pesa isiyo yao kwa kudai kuwa ni Mungu aliwanyooshea mkono wapate Baraka hiyo hivyo wanakuwa wametenda dhambi ya wizi.

Tunatakiwa kujifunza kwa YESU kwa kuwa yeye alijaribiwa katika mambo yote lakini hakutenda dhambi.

                    ‘’Kwa kuwa hamna kuhani mkuu asiyeweza kuchukuana nasi katika mambo yetu ya udhaifu; bali yeye alijaribiwa sawasawa na sisi katika mambo yote, bila kufanya dhambi’’. (Waebrania 4:15)

MAJARIBU KATIKA HUDUMA

Mungu anaweza kuliachilia au kuruhusu  jaribu limpate mtu akiwa anajiandaa kuingia kwenye huduma au uongozi au akiwa kwenye huduma au nafasi ya uongozi.

USHUHUDA: Mchungaji mmoja aliyekuwa anamtumikia Mungu chini ya dhehebu Fulani ,Mungu alimpa kazi ya kwenda kuchunga kanisa Fulani lililokuwa chini ya huduma hiyohiyo aliyokuwepo Mchungaji huyo na alipokwenda katika kanisa hilo waumini waliokuwa kwenye kanisa hilo walimkataa kuwa hastahili kuwachunga na ikatokea alipokuwa akiingia madhabahuni kuhudumu watu wanamvuta atoke madhabahuni na kwa unyenyekevu aliokuwa nao Mchungaji Yule alikaa nay eye kama muumini wa kawaida hku akizidi kumwomba Mungu na kutokana na uvumilivu wake siku moja waumini hao walipatwa na maradhi mabaya sana na walipoingia kuomba mbele za Bwana, Bwana aliwaambia waende kwa Mchungaji Yule waliyemkataa asiwe Mchungaji wao ili awaombee wapone na walipokwenda kuombewa na Mchungaji huyo Mungu aliwaponya na ndipo walipojua hakika Mungu amempa kazi ya kuwachunga na tokea wakati huo Mchungaji huyo aliendelea kuwachunga.

(1 Samweli 18:6-16)

Daudi alipitia majaribu mbalimbali na jaribu lake la kwanza lilianza baada ya yeye kumuua Goliathi.

Majaribu aliyopitia Daudi

v Jaribu la kuwindwa na Mfalme Sauli ili auawe.

v Jaribu la kutaka kupinduliwa kwenye ufalme wake, jaribu lililopitia kwa mtoto wake Daudi ambaye ni Absalomu.

v Jaribu la kunenewa mabaya.

(a) Jaribu la kutaka kuuawa.

Baada ya Daudi kumuua Goliathi na wanawake wakamshangilia ilijenga chuki ndani ya Mfalme Sauli na akaanza kutafuta nafasi ya kumuua Daudi kwa kuwa Mfalme Sauli aliona kuwa Daudi ndiye ambaye atakuja kupewa ufalme hivyo akaamua kumtafuta Daudi ili auawe.

Lakini Daudi alipomkimbia Mfalme Sauli ilifikia hatua Daudi akiwa na kundi lake walifanikiwa siku moja kukuta Sauli na jeshi lake wakiwa wamelala mahali usiku na Daudi alikataa kumuua Mfalme Sauli kwa kuwa Daudi alisema Sauli ni mpakwa mafuta wa Bwana hivyo aliacha kumuua.

JAMBO LA KUJIFUNZA: Je Mungu anapokuwekea adui yako mbele yako au atakapokuwekea adui yako mbele yako utamfanya nini huyo adui yako?

Tunatakiwa kuwa na moyo kama wa Daudi kwani Mungu alipomuweka adui mikononi mwake Daudi alijua ule haukuwa wakati sahihi wa kumuua adui yake bali Dauidi alimwachia Bwana mwenyewe ili ampiganie.

(b) Jaribu la kutaka kupinduliwa kwenye ufalme wake.

(2 Samweli 15:1-18) Ilifikia hatua mtoto wa Daudi ambaye aliitwa Absalomu alimwinukia baba yake na akataka kumpindua kwenye ufalme ili amiliki yeye, japokuwa Daudi alikuwa na jeshi ambalo lingweza kumdhibiti mwanaye lakini Daudi aliamua kumkimbia mwanaye na mwanaye alipokufa Daudi alilia sanasana mpaka wanajeshi wake walimshangaa sana.

(c) Jaribu la kunenewa mabaya.

(2 Samweli 16:5-8) Mfalme Daudi alipitia jaribu hili la kunenewa mabaya(kutukanwa) japokuwa Mfalme Daudi alikuwa na jeshi ambalo lingeweza kumuangamiza mtu Yule aliyekuwa akimtukana lakini Mfalme Daudi alinyamaza kimya tu.

Unaweza ukwa kwenye huduma au ukawa uko kwenye nafasi ya uongozi na watu wanakunenea mabaya hata kama watu hao una uwezo wa kuwadhibirti hebu mwachie Mungu akutetetee kinyume na watu hao hautakiwi kuacha huduma.

Majaribu aliyopitia Nabii Yeremia

(Yeremia 38:1-13) Nabii Yeremia alipitia majaribu mbalimbali kama vile

(a) Kutosikilizwa.

(b) Kutupwa kwenye shimo la matope.

Majaribu aliyopitia Yusufu

v Jaribu la kutupwa kwenye shimo (Mwanzo 37:20).

v Jaribu la kuuzwa Misri (Mwanzo 39:1).

v Jaribu la kulazimishwa kufanya uasherati na mke wa bwana wake(boss) (Mwanzo 39:6-9)

v Jaribu la kufungwa Gerezani kwa kosa lisilo la kwake (Mwanzo 39:20)

SEHEMU YA PILI 
MAJARIBU YANAYOLETWA NA SHETANI

Mtu yeyote ambaye ana mbegu ya wokovu ndani yake lazima apitie majaribu mbalimbali kwa sababu shetani hulenga kuondoa mbegu ya wokovu ndani yetu na kupanda mbegu ya uasi ndani yetu.

Shetani naye anaporuhusu majaribu huwa ana malengo makuum matatu.

v Analenga kututoa kwenye Imani.

v Analenga huduma au tusimtumikie Mungu.

v Analenga kumfanya mtu atende dhambi.